चेतन व्यास, वर्धा|ता. १ जुलै २०२४

एकीकडे शक्तिपीठ महामार्ग रद्द करावा या मागणीसाठी राजकीय नेते आक्रमक झाले असताना दुसरीकडे या महामार्गाच्या समर्थनार्थ वर्धेचे शेतकरी रस्त्यावर उतरले आहेत. शक्तिपीठ महामार्ग रद्द करू नका, आम्हाला योग्य मोबदला द्या आणि आमची जमीन अधिग्रहण करा अशी मागणी करत शेतकऱ्यांनी जिल्हाधिकारी यांना निवेदन दिले.

याबाबत सविस्तर माहिती अशी की, शक्तिपीठ महामार्गाला वर्धा जिल्ह्याच्या शेतकऱ्यांनी समर्थन दिले आहे. या महामार्गाच्या समर्थनार्थ यवतमाळ सह अन्य जिल्ह्याचे शेतकरीसुद्धा रस्त्यावर उतरले आहेत. फक्त शेतकऱ्यांना योग्य मोबदला द्यावा अन् त्यांची जमीन अधिग्रहित करावी. अशी मागणी करत वर्धा येथील शेतकऱ्यांनी जिल्हाधिकाऱ्यांना निवेदन दिले.

या महामार्गमुळे अनेक फायदे होणार असून दळणवळण सोपी होणार आहे. यापूर्वी समृद्धी महामार्गालासुद्धा विरोध करण्यात आला होता आता शक्तिपीठला विरोध केला जात आहे. केवळ अधिग्रहनाची किंमत वाढविण्यासाठी आंदोलन केले जाते आहे असा आरोप यावेळी वर्धेच्या शेतकऱ्यांनी केला.

दरम्यान, शासनाकडून जमिनीचा मोबदला हा चार पट दिला जातो पण या महामार्गाच्या वेळी सरकारने योग्य दराने व निकष लाऊन अधिग्रहण करावे, जेणेकरून शेतकऱ्यांना न्याय मिळेल अशी मागणीही यावेळी शेतकऱ्यांकडून करण्यात आली.