Maharashtra Politics: 'विधानसभेला आम्ही ३० ते ३५ जागा लढवू', स्वाभिमानी संघटनेचे नेते राजू शेट्टींनी रणशिंग फुंकले!

संजय सूर्यवंशी, नांदेड|ता. १ जून २०२४

लोकसभेनंतर राज्यात विधानसभा निवडणुकांचे वारे वाहू लागले आहेत. विधानसभेसाठी महायुती, महाविकास आघाडीसह घटक पक्षांनीही जोरदार मोर्चेबांधणी सुरू केली आहे. स्वाभिमानी शेतकरी संघटनेचे नेते राजू शेट्टी यांनी आगामी विधानसभा निवडणुकांबाबत मोठे विधान केले असून निवडणुकीत ३० ते ३५ जागा लढवणार असल्याचे त्यांनी म्हटले आहे.

नागपूर- गोवा शक्तिपीठ महामार्गाला सध्या मोठा विरोध पाहायला मिळत आहे. विदर्भ, कोकण कोल्हापूर जिल्ह्यातील शेतकऱ्यांसह सर्वपक्षीय नेतेही या महामार्गाविरोधात आक्रमक झाले आहेत. याबाबत बोलताना स्वाभिमानी शेतकरी संघटनेचे नेते राजू शेट्टी यांनी राज्य सरकारवर निशाणा साधला आहे. शक्तिपीठ महामार्गाची गरज काय? असा थेट सवाल त्यांनी उपस्थित केला आहे.

"शक्तिपीठ महामार्गाची मागणी कोणीही केलेली नाही. कोल्हापूर - नागपूर या महामार्गाला हा समांतर महामार्ग आहे. मग या महामार्गाची गरज काय? असा सवाल राजू शेट्टी यांनी उपस्थित केला आहे. समृद्धी महामार्गाला जो मोबदला मिळाला त्याच्या केवळ 40% मोबदला मिळणार आहे. सभागृहात चर्चा झाली. परंतु चर्चा ताकतीने व्हायला पाहिजे होती ती झाली नाही. माझा सर्व पक्षीय नेत्याच्या भूमिकेवर संशय आहे," असेही राजू शेट्टी म्हणाले.

यावेळी बोलताना राजू शेट्टी यांनी आगामी विधानसभा निवडणुकांबाबत महत्वाचे विधान केले. "आगामी विधानसभा निवडणुकीत आम्ही 30 ते 35 जागा लढू शकतो. परंतु त्या कुठून लढवायच्या याबाबत आमचा अजून निर्णय झाला नाही," असे राजू शेट्टी यांनी सांगितले.