बीडच्या मस्साजोगचे सरपंच संतोष देशमुख हत्याकांड प्रकरण आणि २ कोटीच्या खंडणी प्रकरणातील मास्टरमाईंड वाल्मीक कराड सीआयडीच्या कोठडीमध्ये असून त्याची चौकशी सुरू आहे. वाल्मीक कराडने केज न्यायालयामध्ये धाव घेत याचिका दाखल केली आहे. या याचिकेद्वारे वाल्मीक कराडने न्यायालयाला २४ तास मदतनीस मिळावा अशी मागणी केली आहे.

वाल्मीक कराडने केज न्यायालयामध्ये दाखल केलेल्या याचिकेमध्ये असे म्हटले आहे की, 'मला स्लीप अ‍ॅप्निया नावाचा आजार झाला आहे. यामध्ये झोपेत श्वास घेण्यास अडथळा निर्माण होऊ शकतो. ऑटो सीपॅप ( Auto CPAP) मशीनची या आजारात आवश्यकता असते. ही मशीन ऑक्सिजनचा पुरवठा सुरळीत ठेवण्याचे काम करते. हे मशीन लावण्यासाठी मला मदतनीस पाहिजे आहे.'

ऑटो सीपॅप मशीन चालवण्याबाबत त्यांच्यासोबत नेहमी राहत असलेल्या रोहीत कांबळे या सहाय्यकाला माहिती आहे. त्याला सोबत ठेवण्याबाबतची विनंती वाल्मीक कराडने अर्जाद्वारे केली असल्याची माहिती समोर आली होती. वाल्मीक कराडने केलेल्या मागणीची केज जिल्हा व सत्र न्यायालयाने दखल घेतली आहे. न्यायालयाने सीआयडीला शासकीय वैद्यकीय सुविधा पुरविण्याचे सुचवले आहे.

सरपंच संतोष देशमुख हत्या प्रकरणातील मास्टरमाईंड वाल्मीक कराड मंडळवारी दुपारी पुण्यातील सीआयडी मुख्यालयात शरण आला. त्यानंतर सीआयडीने वाल्मीक करायला अटक केली. त्यानंतर वाल्मीक कराडची रवानगी १५ दिवसांच्या सीआयडी कोठडीमध्ये करण्यात आली. दरम्यान, २ कोटींच्या खंडणी प्रकरणात वाल्मीक कराडच्या अडचणीत वाढ झाली आहे. खंडणीप्रकरणी अटकेत असलेल्या विष्णू चाटेची चौकशीत मोठी कबुली दिली आहे. वाल्मीक कराडने पवनचक्की कंपनीच्या अधिकाऱ्यांशी फोनवर संभाषण केले होते, अशी कबुली विष्णू चाटेने सीआयडीला दिली आहे.