नंदुरबार - महाराष्ट्र जिल्हा परिषद व पंचायत समिती अधिनियमानुसार नंदुरबार जिल्हा परिषदेचे उपाध्यक्ष व दोन विषय समिती सभापतींचे रिक्त पद भरण्यासाठी २५ ऑक्टोबर रोजी विशेष सभेचे आयोजन करण्यात आले आहे. जिल्हा परिषदेत शिवसेना काँग्रेसची सत्ता कायम आहे. उपाध्यक्ष व सभापतीपदी कोणाची वर्णी लागणार? याकडे जिल्ह्याचे लक्ष लागून आहे.

नंदुरबार जिल्हा परिषदेतील ११ सदस्यांचे ओबीसी आरक्षणाच्या मुद्यावरुन सदस्यत्व रद्द झाले होते. यामुळे या गटातील सदस्यत्वासाठी नव्याने पोटनिवडणूक घेण्याच्या सूचना निवडणूक आयोगाने दिल्या होत्या. मात्र कोरोनामुळे सदरची निवडणूक लांबणीवर पडली. सप्टेंबर व ऑक्टोबरमध्ये सदर निवडणूक प्रक्रिया पार पडल्यानंतर जिल्हा परिषदेतील पक्षीय बलाबल देखील बदलले आहे.

हे देखील पहा -

सन २०१९ मध्ये जि.प. निवडणूक झाल्यानंतर त्यात भाजपा व काँग्रेसच्या प्रत्येकी २३ तर शिवसेनेच्या ७ व राष्ट्रवादीचे ३ सदस्य निवडून आले होते. मात्र ओबीसी आरक्षणाच्या मुद्यावर भाजपाच्या ७, काँग्रेस व शिवसेनेच्या प्रत्येकी २ सदस्यांचे सदस्यत्व रद्द झाले होते. पोटनिवडणूकीनंतर भाजपाचे ४, काँग्रेस व शिवसेनेचे प्रत्येकी ३ तर राष्ट्रवादीचा १ सदस्य विजयी झाला आहे. यामुळे आता नंदुरबार जि.प. मध्ये सद्यस्थितीत काँग्रेस सर्वाधिक २४, भाजपा २०, शिवसेना ८ तर राष्ट्रवादी ३ असे पक्षीय बलाबल आहे.

दरम्यान, आज जि.प. उपाध्यक्ष व दोन विषय समिती सभापतींच्या निवडीसाठी विशेष सभा होणार आहे. यामुळे नेमके उपाध्यक्षपदाची माळ पुन्हा एकदा ऍड. राम रघुवंशी यांच्या गळ्यात पडते की अन्य काही? तसेच विषय समिती सभापतीपदी कोणाची वर्णी लागते? याकडे जिल्ह्याचे लक्ष लागले आहे. जि.प.च्या विषय समिती सभापती पदासाठी राष्ट्रवादीतर्फे ही मागणी करण्यात आली आहे. त्यामुळे सभापतीपदी कोणाची वर्णी लागणार याकडे जिल्ह्याचे लक्ष लागून आहे.

Edited By - Shivani Tichkule