मनोज तांबे 

वसई : घरगुती गॅस सिलेंडरचा काळा बाजार अनेकदा समोर आला आहे. यातच वसईच्या राजोडी परिसरात घरगुती गॅस सिलेंडरमधून व्यावसायिक गॅस सिलेंडरमध्ये बेकायदेशीर पणे भरत असल्याचा प्रकार समोर आला आहे. दरम्यान हा प्रकार आल्यानंतर पुरवठा विभागाने उघड केला असून काळाबाजार करणाऱ्या विरोधात कारवाई करण्यात आली आहे. 

घरगुती गॅस सिलेंडरचा काळाबाजार केला जात असल्याचे अनेकदा समोर आले आहे. प्रामुख्याने सिलेंडरचे ब्लॅक मार्केट करत अधिक दराने विक्री केली जात असते. याच माध्यमातून रिक्षा तसेच कार मध्ये अवैधपणे गॅस भरला जात असल्याचे सातत्याने समोर आले आहे. पुरवठा विभाग तसेच पोलीस प्रशासनाकडून अनेकदा कारवाई करण्यात येत असताना देखील हा अवैध प्रकार थांबलेला नाही. अशात वसईमध्ये पुन्हा काळाबाजार समोर आला आहे. 

गुन्हा दाखल करत दोन जणांना घेतले ताब्यात  

वसईमध्ये घरगुती गॅस सिलेंडरमधून व्यावसायिक सिलेंडरमध्ये अवैधपणे गॅस भरणा केला जात होता. हा प्रकार पुरवठा विभागाने उघडकीस आणला असून या कारवाईत ५२ सिलेंडर जप्त करण्यात आले आहेत. तसेच या प्रकरणी अर्नाळा पोलीस ठाण्यात आरोपींविरोधात गुन्हा दाखल झाला आहे. तर दोन आरोपी अटक असल्याची माहिती अर्नाळा पोलीस ठाण्याचे वरिष्ठ पोलीस निरीक्षक विजय पाटील यांनी दिली आहे. 

६ लाख ३३ हजाराच्या मुद्देमाल हस्तगत 

दरम्यान या कारवाईत ५२ सिलेंडर, इलेक्ट्रीक वजन काटा, इलेक्ट्रिक मोटार व रबरी पाईप तसेच पिकप टेम्पो असा ६ लाख ३३ हजार रुपये किंमतीचा मुद्देमाल जप्त केला आहे. याप्रकरणी अर्नाळा सागरी पोलीस ठाण्यात गुन्हा दाखल करण्यात आला आहे. या प्रकरणी पोलिसांकडून अधिक चौकशी सुरु आहे.