Ujjwal Nikam On Shivsena : निवडणूक आयोगाने  शिवसेना हे नाव आणि धनुष्यबाण हे चिन्ह मुख्यमंत्री एकनाथ शिंदे यांना देण्याचा निर्णय घेतला. या निर्णयाविरोधात ठाकरे गटाने नाराजी व्यक्त केली आहे. तसंच आपण लवकरात लवकर सु्प्रीम कोर्टात जाणार, असं देखील उद्धव ठाकरेंनी म्हटलंय. दरम्यान, सुप्रीम कोर्टात गेल्यास उद्धव ठाकरे यांना धनुष्यबाण चिन्हासह शिवसेना पक्षाचं नाव परत मिळणार का? असा प्रश्न अनेकांना पडला आहे. (Latest Marathi News)

या संदर्भात साम टीव्हीने ज्येष्ठ कायदेतज्ज्ञ उज्ज्वल निकम यांच्याशी संवाद साधला असता, अतिशय स्पष्ट शब्दात उत्तरे दिली आहेत. एकदा निवडणूक आयोगाने निकाल दिल्यावर तो निकाल अंतिम असतो, मात्र अपवादात्मक प्रकरणात सुप्रीम कोर्टात हा विषय स्टँड होऊ शकतो, त्यांना दाद मागता येते, असं उज्ज्वल निकम यांनी म्हटलं आहे. (Political News)

मात्र, निवडणूक आयोगाच्या निर्णयाविरोधात सुप्रीम कोर्टात गेल्यास उद्धव ठाकरे (Uddhav Thackeray) यांना शिवसेनेवर त्यांचाच अधिकार कसा आहे ते सिद्ध करावे लागेल. अन्यथा निवडणूक आयोगाने दिलेला हा निर्णय अंतिम आहे, असंही उज्ज्वल निकम म्हणाले. दुसरीकडे सुप्रीम कोर्टाने १६ आमदारांच्या अपात्रतेसंदर्भात ठाकरे गटाच्या बाजूने निकाल दिल्यास, निवडणूक आयोगाच्या निर्णयावर विचार होऊ शकतो.

सुप्रीम कोर्टाच्या (Supreme Court) निर्णयानंतर पूर्णविराम मिळेल, तो निकाल माईल स्टोन ठरेल, त्यामुळं निवडणूक आयोगाचा निकाल हा एकनाथ शिंदे यांना मानसिक आनंद देणारा आहे. तो किती वेळ टिकेल हे सांगता येत नाही, असंही उज्ज्वल निकम यांनी म्हटलं आहे.

'ठाकरेंनी ठाकरे नावाचा पक्ष काढावा'

उद्धव ठाकरेंनी आता ठाकरे नावाचा पक्ष काढावा, असा सल्ला शिंदे गटाचे अर्थान शिवसेनेचे मंत्री दीपक केसरकर यांनी दिला आहे. शिवसेनेतून बाहेर पडलेल्यांनी आतापर्यंत कधीही ठाकरे नावाने पक्ष काढलेला नाही. राज ठाकरे तसेच इतर नेत्यांनीही हे नाव वापरलं नाही. त्यामुळे उद्धव ठाकरे यांना हे नाव वापरण्यास हरकत नाही, असा खोचक सल्ला शालेय शिक्षण मंत्री दीपक केसरकर यांनी दिला आहे.

Edited By - Satish Daud