अकोट आणि अचलपूर नगरपालिकेत सत्तेसाठी एकमेकांचे कट्टर विरोधक असलेल्या एमआयएमसोबत भाजपनं घरोबा केला.. आणि आता त्याचं पुढचं पाऊल पडलंय ते सोलापूरच्या जिल्हा परिषद निवडणुकीत... दोन्ही पवारांपाठोपाठ आता सोलापूरच्या बार्शीत भाजपला रोखण्यासाठी कट्टर विरोधक असलेले ठाकरेसेना आणि शिंदेसेनेनं एकीची वज्रमूठ आवळलीय.. बार्शीचे भाजप नेते राजेंद्र राऊत यांच्याविरोधात दिलीप सोपल यांनी नव्या युतीचं समीकरण जुळवलंय..

हा बॅनर नीट पाहा....ठाकरेसेनेचे बार्शीचे आमदार दिलीप सोपल यांनी भाजपला रोखण्यासाठी शिंदेसेना, आणि दोन्ही राष्ट्रवादीसोबत युतीची घोषणा केलीय.. त्याचा बॅनर सोशल मीडियावर पोस्ट करण्यात आलाय.. या बॅनरवर उद्धव ठाकरेंसोबत, एकनाथ शिंदे, शरद पवारच नाही तर अजित पवारांचाही फोटो आहे.... मात्र बार्शीतील युती ही अधिकृत नसल्याचं दावा संजय राऊतांनी केलाय.. तर महायुतीतील पक्षच विरोधी पक्षासोबत युती करत असल्यानं भाजपनं शिंदेसेना आणि अजित पवारांच्या राष्ट्रवादीला महायुतीच्या धर्माची आठवण करुन दिलीय.

खरंतर भास्कर जाधवांनी मुंबई महापालिकेत शिंदेंनी ठाकरेंना महापौरपदासाठी पाठींबा देण्याचं आवाहन केलं होतं.. मात्र हा प्रस्ताव संजय राऊतांनी तातडीनं फेटाळून लावला होता. आता तेच समीकरण सोलापूरच्या बार्शीत पाहायला मिळतंय.. त्यामुळे जनतेचं मत जाणून घेण्यासाठी ठाकरे आणि शिंदेसेनेकडून लिटमस टेस्ट घेतली जातेय का अशी चर्चा रंगलीय....त्यामुळे सर्व प्रादेशिक पक्षांनी हा प्रयोग सोलापूरच्या बाहेरही राबवल्यास भाजपपुढे मोठं आव्हान उभं राहण्याची शक्यता आहे...