एकमेकांविरोधात टीकेची झोड उठवणारे ठाकरे बंधू हिंदी सक्तीच्या विरोधात एकत्र आलेत. हिंदी सक्तीवरुन ठाकरे बंधू सरकारला घेरण्याच्या तयारीत आहेत. पाहूयात यावरचा हा स्पेशल रिपोर्ट. ऐकलंत हिंदी सक्तीच्या मुद्द्यावरून आता उद्धव ठाकरेंनीही आता आक्रमक पवित्रा घेतलाय.

महाराष्ट्रात हिंदी सक्ती खपवून घेणार नसल्याचे उद्धव ठाकरेंनी ठणकावून सांगितलंय. विशेष म्हणजे हिंदू आणि हिंदी कनेक्शचा मुद्दाही खोडून काढलाय. त्यामुळे हिंदी सक्तीचा मुद्दा महाराष्ट्रात पेटणार असल्याचं संकेत यातून मिळाले आहेत. कारण उद्धव ठाकरेंनी थेट फडणवीसांचं नाव घेऊन त्यांना याबाबत आव्हान दिलंय. त्यामुळे हिंदी सक्तीच्या मुद्यावर पुन्हा ठाकरे-फडणवीस संघर्ष पाहायला मिळणार असल्याचं दिसतंय.

दोन दिवसांपूर्वी मनसे अध्यक्ष राज ठाकरेंनीही हिंदी सक्तीच्या मुद्द्यावरून सरकारला धारेवर धरलं. तसंच हिंदू असलो तरी हिंदी नसल्याचं सध्या जवळीक असलेल्या भाजपला ठणकावून सांगण्याचा प्रयत्न केला. राज ठाकरेंनी काय भूमिका मांडली होती पाहा.

महाराष्ट्रात 'हिंदी' पहिलीपासून का शिकायची?

दुसऱ्या प्रांताची भाषा महाराष्ट्रात लादण्याचे कारण काय?

महाराष्ट्राचे 'हिंदीकरण' कशासाठी?

हिंदीची सक्ती दक्षिणेच्या राज्यात कराल का?

शालेय अभ्याक्रमातील हिंदीची पुस्तके विकू देणार नाही

गेल्या काही वर्षांपासून उद्धव आणि राज ठाकरेंची अनेक मुद्द्यांवर टोकाच्या विरोधाची भूमिका असते. कारण उद्धव ठाकरे ज्याच्या विरोधात त्याच्याशी राज ठाकरेंची जवळीक असल्याचं वारंवार दिसून आलंय. मात्र गेल्या अनेक वर्षांनंतर पहिल्यांदाच हिंदीसक्तीच्या मुद्यामुळे उद्धव आणि राज ठाकरेंनी एकत्रित भाजपच्या विरोधात शड्डू ठोकले आहेत. आणि हाच मुद्दा दोघांना एकत्र आणणार का याकडेही महाराष्ट्राचं लक्ष लागलंय.