पराग ढोबळे, नागपूर | साम टीव्ही

केंद्रीय मंत्री आणि भाजपचे ज्येष्ठ नेते नितीन गडकरी यांच्याकडे १०० कोटी रुपयांची खंडणी आणि जीवे मारण्याची धमकी दिल्याप्रकरणी नागपूर न्यायालयानं दोन आरोपींना पाच वर्षे सश्रम कारावासाची शिक्षा सुनावली. तसेच दंडाची शिक्षा सुनावली आहे. दंड न भरल्यास अतिरिक्त कारावास भोगावा लागणार आहे, असे न्यायालयाने आदेशात म्हटले आहे.

जयेश पुजारी आणि अफसर पाशा अशी दोन्ही आरोपींची नावे आहेत. या आरोपींनी नितीन गडकरींकडे १०० कोटी रुपयांच्या खंडणीची मागणी केली होती. तसेच त्यांना जीवे मारण्याची धमकी दिली होती. १४ जानेवारी आणि त्याच्या दोन महिन्यांनी म्हणजेच २१ मार्च रोजी गडकरी यांच्या कार्यालयामध्ये जीवे मारण्याच्या धमकीचे फोन केले होते. हे दोन्ही फोन कर्नाटकातील तुरुंगातून केले होते, असे तपासात स्पष्ट झाले होते. या दोन्ही आरोपींना यूएपीएसह अनेक गंभीर कलमांखाली दोषी ठरवण्यात आले होते.

नितीन गडकरी खंडणी आणि धमकी प्रकरणात तपास केल्यानंतर बेंगळुरू कनेक्शन समोर आले होते. त्यानुसार, नागपूर पोलिसांनी २८ मार्चला बेंगळुरूच्या तुरुंगातून जयेशला ताब्यात घेतले होते. त्यानंतर त्याला नागपुरात आणले. त्याची चौकशी केली असता, धक्कादायक माहिती समोर आली होती. लश्कर ए तोयबा, हिजबुल मुजाहिद्दीन आणि पीएफआय यांसारख्या दहशतवादी संघटनांशी त्यांचे कनेक्शन असल्याचे उघड झाले. त्यांच्याविरोधात यूएपीए अंतर्गत गुन्हे नोंदवले होते.

जयेश पुजारी आणि पाशा या दोघांना न्यायालयाने पाच वर्षे सश्रम कारावास आणि दंडाची शिक्षा सुनावली. दंड न भरल्यास एक वर्षे अतिरिक्त कारावासाची शिक्षा भोगावी लागणार आहे. तर कलम ५०७ अंतर्गत दाखल गुन्ह्यात दोन वर्षांच्या तुरुंगवासाची शिक्षा आणि पाच हजार रुपयांच्या दंडाची शिक्षा सुनावली आहे. दंड भरला नाही तर १० महिने अतिरिक्त कारावासाची शिक्षा सुनावली आहे. या प्रकरणी सरकारी पक्षाकडून एकूण ६५ साक्षीदार तपासण्यात आले.