महाराष्ट्राची कुलस्वामिनी आणि साडेतीन शक्तीपीठांपैकी एक पूर्ण पीठ असलेल्या श्री तुळजाभवानी मातेच्या चरणी दररोज लाखो भाविक मोठ्या श्रद्धेनं लीन होतात...मात्र पवित्र मंदिराच्या परिसरात काही लुटारूंनी श्रद्धेचा बाजार मांडलाय...भवानीच्या दर्शनासाठी मंदिरात येणाऱ्या भाविकांची बोगस पुजारी आणि एजंटांकडून सर्रास लूट केली जातेय...याच लुटारुंचा साम टीव्हीनं केलेल्या 'स्टिंग ऑपरेशन'मध्ये पर्दाफाश झालाय...

विशेष म्हणजे, पैसे घेतल्यानंतर हे एजंट भाविकांना कुठल्याही विशेष मार्गाने न नेता... विनाशुल्क असलेल्या 'मुख दर्शन' रांगेत ढकलून देतात.. त्यात साम टिव्हीच्या स्टिंग ऑपरेशनदरम्यान संशय आल्यानं या लुटारू पुजाऱ्यानं पूजा केली तर दर्शन फ्री असल्याची सारवासारव केली. एजंट आणि बोगस पुजाऱ्याचं हे रॅकेट असून प्रत्येक भाविकाकडून दर्शनासाठी 100 रुपये उकळले जातात. दिवसभरात अशा शेकडो भाविकांना गंडा घालण्यात येतो. आणि यातून दररोज हजारो रुपयांची लूट होत असते.

या प्रकारामुळे केवळ भाविकांचीच लूट होत नसून, आई तुळजाभवानीचे अधिकृत पुजाऱ्यांची देखील बदनामी होतेय... त्यामुळे पुजारी मंडळाने या प्रकारावर तीव्र संताप व्यक्त करत... बोगस पुजाऱ्यांवर बंदी घालण्याची मागणी केलीय...

एकीकडे मंदिराच्या आवारात एवढा मोठा गोरखधंदा उघडपणे सुरू असताना, तुळजाभवानी मंदिर संस्थान काय करत आहे? असा सवाल आता उपस्थित होतोय...या संपूर्ण रॅकेटबाबत 'साम टीव्ही'ने मंदिर संस्थानचे अध्यक्ष तथा जिल्हाधिकार्‍यांकडे विचारणा केली असता, "बोगस पुजारी आणि एजंटांवर लक्ष ठेवण्यासाठी आम्ही विशेष पथक नियुक्त केले आहे," असे मोघम उत्तर प्रशासनाकडून देण्यात आलं. मात्र, या गंभीर विषयावर कॅमेऱ्यासमोर येऊन अधिकृत भूमिका मांडण्यास प्रशासकीय अधिकार्‍यांनी स्पष्टपणे टाळाटाळ केली. मात्र साम टीव्हीच्या स्टिंग ऑपरेशनमध्ये या रॅकेटचा पर्दाफाश झाल्यामुळे आता तरी प्रशासन आणि तुळजाभवानी संस्थान भाविकांची लूट कायमची थांबवणार का? हा खरा प्रश्न आहे.