नंदुरबारमधून भीषण अपघाताची बातमी समोर येत आहे. सातपुडा पर्वतरांगातील देवगोई घाट परिसरात स्कूल बसचा भीषण अपघात घडला. विद्यार्थ्यांना घेऊन जाणारी स्कूल बस थेट शंभर ते दीडशे फूट खोल दरीत कोसळली.

मिळालेल्या माहितीनुसार, या स्कूल बसमधून साधारण २० ते ३० विद्यार्थी प्रवास करीत होते. अपघातामुळे अनेक विद्यार्थी जखमी झाले असून, एका विद्यार्थ्याचा मृत्यू झाल्याची माहिती आहे. या घटनेनंतर बचाव पथकाने तातडीने घटनास्थळी धाव घेतली असून, जखमी विद्यार्थ्यांना रूग्णालयात हलवण्यात येत आहे.

नंदुरबार जिल्ह्यातील सातपुडा पर्वत रांगातील देवगोई घाट परिसरात भीषण अपघाताची घटना घडली. मोलगी गावाहून अक्कलकुवाच्या दिशेने विद्यार्थ्यांना घेऊन जात असताना आम्लीबारी घाटात हा अपघात घडला. नियंत्रण सुटल्यानं स्कूल बस खेट दरीत कोसळली. मिळालेल्या माहितीनुसार, स्कूल बसमध्ये साधारण २० ते ३० विद्यार्थी असल्याची माहिती आहे.

दीडशे फूट खोल दरीत स्कूल बस कोसळल्यानं गाडीचा अक्षरश: चक्काचूर झाला आहे. दरम्यान, अपघात घडल्यानंतर अनेक विद्यार्थी स्कूल बसखाली दबले गेले. या दुर्देवी अपघातात एका विद्यार्थ्याचा मृत्यू झाल्याची माहिती आहे. तर, अनेक विद्यार्थी जखमी आहेत. अपघाताची माहिती मिळताच परिसरात एकच खळबळ उडाली.

स्थानिक नागरिकांनी तातडीने पोलिसांना तसेच बचाव पथकाला या अपघाताबाबत माहिती दिली. बचाव पथकांनी स्थानिकांची मदत घेऊन विद्यार्थ्यांना स्कूल बसमधून बाहेर काढलं. तसेच जवळच्या ग्रामीण रूग्णालयात उपचारासाठी नेलं. सध्या जखमी विद्यार्थ्यांवर उपचार सुरू आहेत. हा अपघात नेमका कसा घडला? याबाबत चौकशी पोलिसांकडून सुरू आहे.