जळगाव मधून मोठी बातमी समोर आली आहे. अयोध्याहून परतणाऱ्या जळगाव जिल्ह्यातील भाविकांचा भीषण अपघात झाला. हा अपघात धरणगाव तालुक्यातील कल्याणे होळ गावातील भाविकांच्या बसला उत्तर प्रदेशातील सुलतानपूर येथील अयोध्या-प्रयागराज महामार्गावर झाला. या दुर्घटनेत एका महिला भाविकांचा मृत्यू झाल्याची माहिती असून २५ ते ३० जण जखमी झाल्याची झाले. आज शनिवारी पहाटे ४ वाजता हा अपघात झाला.

मिळालेल्या माहितीनुसार, धरणगाव तालुक्यातील कल्याणे होळ येथील भाविक अयोध्यातील भगवान राम लल्लाचे दर्शन घेण्यासाठी गेले होते. दर्शन घेतल्यानंतर बसने प्रयागराजला जात होते. या बसमध्ये अंदाजे ४० भाविक होते. भाविकांनी भरलेली बस सुलतानपूर येथील कुरेभर चौकात पोहोचताच, समोरून एका अनियंत्रित ट्रेलरने बसला धडक दिली. धडक इतकी जोरदार होती की बस आणि ट्रेलर दोन्ही उलटले.

उलटलेल्या बसमध्ये अडकलेल्या प्रवाशांना बाहेर काढण्यासाठी स्थानिक आणि रस्त्यावरून जाणारे लोक मदतीसाठी धावले. सुमारे १५ ते २० भाविकांना दुखापत झाली. तर एका महिला भाविकाचा मृत्यू झाल्याची माहिती आहे. जखमी प्रवाशांना रुग्णवाहिकेद्वारे कुरेभर सामुदायिक आरोग्य केंद्रात तातडीने नेण्यात आले.

अपघाताची माहिती मिळताच पोलिसांनी घटनास्थळी धाव घेतली आहे. हा अपघात नेमका कसा झाला? अपघातात नेमकी चूक कोणाची याबाबत पोलीस अधिक तपास करत आहेत. शिवाय फिरायला गेलेल्या सर्व नागरिकांशी स्थानिक प्रशासनासोबत संवाद सुरू आहे. जखमींना रेल्वेने जळगावत आणण्याचा देखील प्रयत्न सुरू असल्याची माहिती जिल्हाधिकारी यांनी बोलताना दिली आहे. या घटनेमुळे गावात हळहळ व्यक्त होत असून पुढील घडामोडींवर सर्वांचे लक्ष लागले आहे.