बीड: बीड जिल्ह्यातील देवस्थान आणि वक्फ बोर्ड जमीन घोटाळा (Waqf Board Land Scam) प्रकरण राज्यात गाजत आहे. तर याविषयी साम टीव्ही प्रत्येक बातमी दाखवत असून याचा पाठपुरावा करत आहे. या प्रकरणात आता काही आरोपींनी हात टेकल्याचं समोर आलंय. बीड शहरातील शहावली दर्गा जमीन घोटाळा प्रकरणातील, 3 आरोपींनी पोलिसांसमोर आत्मसमर्पण केलं आहे. शेख आशपाक शेख गौस पाशा 37, रा. राजीवनगर धानोरा रोड बीड, शेख मुजाहिद मुजीब शेख 35 रा .बीड मामला बीड, अजीज उस्मान कुरेशी 47,रा . मोमीनपुरा बीड अशी त्या आरोपींची नावे आहेत.

बीड शहरातील शहेंनशाहवली दर्गाची 409 एकर 5 गुंठे जमीन, अधिकाऱ्यांशी संगनमत करून, बनावट कागदपत्रे तयार करत भूमाफियांनी लाटली होती. तर याच दर्गा हजरत शहशाहवली दर्गाची 10 एकर जमीन राष्ट्रीय महामार्ग क्र. 211 लगत सर्व्हे क्र. 22 व 95 मध्ये आहे. याच्या मावेज्यापोटी तब्बल 15 कोटी रुपये शासनदरबारी आले आहेत. तेच हडपण्यासाठी हा गैरव्यवहार, लाचखोरी, मनी लॉडिंग झाल्याचे जिल्हा वक्फ बोर्ड अधिकाऱ्यांनी तक्रारीत म्हटलंय. याप्रकरणी 29 डिसेंबर 2021 रोजी बीडच्या शिवाजीनगर पोलीस ठाण्यात तत्कालीन बडतर्फ उपजिल्हाधिकारी प्रकाश आघाव, तत्कालीन तहसीलदार, तत्कालीन मंडळाधिकारी, तलाठी अशा 8 अधिकारी कर्मचाऱ्यांसह व इतर 7 अशा तब्बल 15 जणांवर गुन्हा नोंद झालेला आहे.

दरम्यान साम टीव्ही जिल्ह्यातील जमीन घोटाळ्याची बातमी दाखवत, पाठपुरावा करत असून त्यानंतर आता जिल्ह्यात एक एक कारवाई होत आहे. याच पार्श्वभूमीवर आता 3 घोटाळेबाजांनी आत्मसमर्पण केल्यानं तपासाला गती मिळणार आहे. मात्र अद्याप मुख्य आरोपी फरार असल्यानं, या आरोपींना तात्काळ अटक करण्यात यावी. अशी मागणी देखील बीडकरांमधून होत आहे.

Edited By: Pravin Dhamale