आगामी स्थानिक स्वराज्य संस्थाच्या निवडणुकीमुळे राजकीय घडामोडींना वेग आला आहे. आगामी निवडणुकीमुळे कोकणातील राजकारणातही मोठे बदल होताना दिसत आहे. काही दिवसांपूर्वी माजी आमदार राजन साळवी यांनी शिंदेंच्या शिवसेना प्रवेश केला. त्यानंतर ठाकरे गटाचे जिल्हा प्रमुख संजय कदम शिंदेंच्या शिवसेनेच्या मार्गावर असल्याची चर्चा सुरु झाली आहे. काही दिवसांपूर्वी संजय कदम आणि माजी मंत्री रामदास कदम यांची चर्चा झाली. त्यानंतर ठाकरे गटाने माजी आमदार संजय कदम यांची पक्षातून हकालपट्टी केली आहे.

ठाकरे गटाने रत्नागिरी जिल्हाप्रमुख संजय कदम यांची पक्षातून हकालपट्टी केली आहे. उत्तर रत्नागिरीचे जिल्हाप्रमुख संजय कदम यांनी पक्षविरोधी कारवाया केल्याचा ठपका त्यांच्यावर आहे. जिल्हाप्रमुख संजय कदम शिंदेंच्या शिवसेनेत जाणार असल्याची रंगली चर्चा होती. संजय कदम यांचा शिंदेंच्या शिवसेनेत जाणार हे जवळपास निश्चित मानला जातो.

ठाकरे पक्षात राहून त्यांनी पक्षविरोधी केल्याने ठाकरे शिवसेना मध्यवर्ती कार्यालयातून हाकालपट्टीचं पत्रक प्रसिद्ध करण्यात आलं आहे. या पत्रकावर शिवसेना सचिव विनायक राऊत यांच्या सहीचं पत्र आहे. संजय कदम हे 2014 साली दापोली मतदारसंघातून राष्ट्रवादीतून आमदार निवडून आले. त्यानंतर या मतदारसंघातून पाच टर्म निवडून येणारे सुर्यकांत दळवी यांचा त्यांनी पराभव केला. योगेश कदम यांच्या विरोधात दोन टर्म संजय कदम यांचा पराभव झाला आहे.

दरम्यान, माजी आमदार राजन साळवींचा भाजपमध्ये प्रवेश निश्चित मानला जात होता. त्यांच्या भाजप प्रवेशाची चर्चा सुरु असताना अचानक शिंदे गटाच्या प्रवेशाची चर्चा सुरु झाली. त्यानंतर भाजप प्रवेशाऐवजी शिंदेंच्या शिवसेनेत प्रवेश केला. किरण सामंत यांच्या विरोधात निवडणूक लढवणारे साळवींनी थेट शिंदे गटात प्रवेश केला. यामुळे राजकीय वर्तुळात चर्चांना उधाण आलं आहे.