राज्यात मेगा पोलीस भरती सुरू आहे. मात्र या भरतीत सुरू असलेल्या आरक्षित प्रवर्गाच्या गोंधळाचा मराठा उमेदवारांना मोठा फटका बसतोय. याच गोंधळामुळे नाशिकमध्ये पोलीस भरतीत EWS प्रवर्गात निवड झालेल्या मराठा समाजातील भावी पोलिसांची उमेदवारी स्थगित करण्यात आलीये.

कारण या उमेदवारांची ‘SEBC’ आणि ‘खुल्या प्रवर्गात निवड करण्याच्या सूचना देण्यात आल्या होत्या. त्यानुसार नाशिक पोलीस आयुक्तालयानं या मराठा उमेदवारांना हमीपत्र सादर करण्यास सांगितले होते. मात्र यातल्या काही विद्यार्थ्यांनी हमीपत्र देण्यास विरोध दर्शवला. त्यामुळे या विद्यार्थ्यांच्या निवडीत अडचणी निर्माण झाल्या आहेत.

प्रवर्ग गोंधळाचा मराठा उमेदवारांना फटका

पोलीस भरतीत मराठा उमेदवारांची EWS प्रवर्गातून निवड. शासनाच्या खुल्या आणि SEBC मधून निवडीच्या सूचना. काही मराठा उमेदवारांचा प्रवर्ग बदलण्यास आक्षेप. 6 पैकी 4 उमेदवारांचा हमीपत्र देण्यासही नकार. नाशिक पोलिस आयुक्तालयाची वरिष्ठ कार्यालयाकडे धाव. शासन निर्णय होईपर्यंत उमेदवारी स्थगित ठेवण्याच्या सूचना देण्यात आल्या.

SCBC प्रवर्गातून निवड झालेल्या उमेदवारांचं भवितव्य कोर्टाच्या निर्णयावर अवलंबून आहे. त्यामुळे आर्थिक दुर्बल मराठा विद्यार्थी EWS प्रवर्गातून अर्ज दाखल करत आहेत. मात्र त्यातही आता अडचणी निर्माण होतायत. त्यामुळे मेहनत करूनही अशा मराठा उमेदवारांचं भवितव्य टांगणीला लागलंय.