- सागर निकवाडे

Nandurbar News :

तळोदा शहरातील गणपती गल्लीत गाईने हल्ला केल्याने एक जण गंभीर जखमी झाल्याची घटना घडली आहे. यामुळे मोकाट जनावरांच्या प्रश्न ऐरणीवर आला आहे. पालिकेच्या अकार्यक्षमतेवर नागरिक नाराजी व्यक्त करु लागले आहेत. (Maharashtra News)

तळाेदा शहरातील गणपती गल्लीतील रहिवासी दिगंबर गुलाबराव सोनार (वय 66) हे आपल्या घरातून जवळील दुकानावर निघाले हाेते. त्यावेळी रस्त्यात उभे असलेल्या मोकाट गायींपैकी एका गाईने त्यांच्यावर अचानक हल्ला केला व शिंगावर उचलून घेत त्यांना फेकून दिले.

त्यामुळे दिगंबर सोनार हे गंभीर जखमी झाले. त्यांच्या उजव्या हाताच्या खांदा जायबंदी झाला व डाेक्याला गंभीर इजा झाली. तळोदा शहरातील मोकाट गुरांमुळे एखाद्याच्या जीव गेल्यावर पालिका जागी होईल का ? असा प्रश्न घटनेनंतर उपस्थित हाेऊ लागला आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

याबाबत वारंवार तक्रारी करून देखील पालिका प्रशासन कारवाई करत नसल्यामुळे अशा घटनांमध्ये वाढ होत आहे. शेवटी पालिका प्रशासन मोकाट जनावरांवर व त्यांच्या मालकांवर कारवाई करेल की नाही असा प्रश्न नागरिक करु लागले आहेत.

Edited By : Siddharth Latkar