भरत मोहोळकर, साम टीव्ही, प्रतिनिधी

महाविकास आघाडी आणि महायुतीत मुख्यमंत्रिपदावरून रस्सीखेच सुरु आहे. त्यातच दिल्लीत आपच्या अतिशी मार्लिना यांनी मुख्यमंत्रिपदाची शपथ घेताच महाराष्ट्रातही महिला मुख्यमंत्री होणार का य़ाची चर्चा सुरु झालीय. त्याला कारणाही तसंच आहे. काँग्रेसच्या खासदार वर्षा गायकवाडांनी महाराष्ट्रात महिला मुख्यमंत्री हवी असं विधान केलं. त्या तेवढ्यावरच थांबल्या नाहीत.

तर त्यांनी थेट सुप्रिया सुळे आणि रश्मी ठाकरेंच्या नावाला पसंती दर्शवली. मात्र ठाकरे गटाला हे विधान पचनी पडलेलं नाही. रश्मी ठाकरेंना राजकारणात रस नाही. त्यामुळे त्यांना यात ओढू नका असा खोचक सल्ला ठाकरे गटाच्या नेत्या किशोरी पडणेकरांनी काँग्रेसला दिलाय.

यामुळे मात्र महायुतीच्या नेत्यांना आयतं कोलित मिळालंय. काँग्रेसमध्ये अंतर्गत वाद असल्यामुळेच वर्षा गायकवाडांनी ठाकरे आणि सुळेंचं नाव घेतल्याचा टोला शिंदे गटानं लगावलाय. तर राज्यात काँग्रेसचे आठ मुख्यमंत्री फिरत असले तरी सुप्रिया सुळेंनाच मुख्यमंत्री करण्याची पवारांनी तयारी सुरू केल्याचा दावा भाजप प्रदेशाध्यक्ष चंद्रशेखर बावनकुळेंनी केलाय.

पुरोगामी महाराष्ट्रात 65 वर्षात एकही महिला मुख्यमंत्री झाली नाही. तर देशाच्या पंतप्रधान पदापासून ते राष्ट्रपती पदापर्यंत महिलांनी आपलं कतृत्व सिद्ध केलंय.

मात्र आता महाविकास आघाडीत मुख्यमंत्री पदावरून रस्सीखेच सुरु असतानाच सुप्रिया सुळे आणि रश्मी ठाकरेंच्या नावाची चर्चा सुरू झालीय...त्यामुळे महाविकास आघाडीची सत्ता आल्यास मुख्यमंत्रिपदाची माळ कुणाच्या गळ्यात पडणार याची आता अधिकच उत्सुकता वाढलीय.