अकोला: शेतकरी नेते आणि आपल्या हटके आंदोलनाने संपूर्ण राज्यभर प्रसिद्ध असलेले राज्यमंत्री तथा अकोला जिल्ह्याचे पालकमंत्री बच्चू कडू हे बरेचदा प्रकाशझोतात येत असतात. मात्र त्यांचे सहकारीही काही कमी नाहीत. त्यांचे स्वीय सहायक असलेले डॉ. दीपक ठाकरे यांचा एक फोटो सध्या सोशल मीडियावर चांगलाच व्हायरल झाला आहे. (Such is the humanity of Bachchu Kadu's secretary; Helps Her crippled by sitting on the steps)

हे देखील पहा -

अकोल्यातील जिल्हाधिकारी कार्यालय परिसरात बच्चू कडू यांचे कार्यालय आहे. साहजिकच या कार्यालयात व्यथा, समस्या घेऊन येणाऱ्यांची संख्या काही कमी नाही. दिवसभर शेकडो नागरिक आपल्या समस्यांना घेऊन पालकमंत्री कडू यांचे कार्यालय गाठतात. बच्चू कडू यांच्याकडे मदतीची आस घेऊन अनेक दिव्यांगही या कार्यालयात येतात. दरम्यान पालकमंत्री बच्चू कडू यांचे स्वीय सहायक दीपक ठाकरे यांनी एका दिव्यांगांच्या मदतीसाठी कार्यालयातून बाहेर येत थेट पायरीवर बसून विचारपूस केली.

अकोल्यातील कृष्णा बोराडे नामक दिव्यांगाला पायऱ्या चढता येत नसल्याने आपली समस्या कशी मांडणार असा प्रश्न त्याला पडला. दोन्ही पाय नाही व एक हातही नसलेला हा दिव्यांग कार्यालयापर्यंत कसा बसा आला. आपल्याला तीन चाकी सायकल मिळाली तर नक्कीच त्याची मदत होईल. स्वीय सहायक असलेल्या दीपक ठाकरे यांनी त्या दिव्यांगासोबत खाली पायरीवर बसून त्याच्याशी माणुसकीचा संवाद साधला. आस्थेने विचारपूस केल्यानंतर त्याला हवी असलेली मदत देण्यासाठी शासकीय पातळीवर पाठपुरावा करण्याचे आश्वासन दिले.

बच्चू कडू यांनी राजकारणात येण्यापूर्वीपासून जोपासलेला माणुसकी आणि सेवेचा वसा त्यांच्या राज्यमंत्री होण्यानंतरही त्यांनी जोपासला. तसा तो त्यांच्या अधिनस्त काम करणाऱ्या अधिकारी-कर्मचाऱ्यांकडूनही जोपासला जाईल, याची काळजी त्यांनी घेतल्याचे या घटनेतून दिसून येते.

Edited By - Akshay Baisane