>> संजय सूर्यवंशी

Nanded Success Story: नांदेडमधील एका तरुणाची सध्या राज्यभरात चर्चा आहे. आयआयटीचे उच्च शिक्षण घेतलेल्या या तरुणाने गांडूळ खत निर्मिती प्रकल्प उभारला असून या खत निर्मितीमधून तो महिन्याला लाखो रुपयांची कमाई करत आहे.

नांदेड तालुक्यातील लिंबगाव येथील हा तरुण असून या तरुणाने जवळच असलेल्या पिंपळाभत्या येथे हा प्रकल्प सुरू केला आहे. प्रज्ञानंद पोहरे असं या तरुणाचे नाव आहे. बेंगळुरू येथे सध्या तो एका कंपनीमध्ये ऑनलाईन नोकरी देखील करतो.

ऑस्ट्रेलियन प्रजातीच्या गांडूळाची शेती

नोकरी सोबतच फावल्या वेळात या तरुणाने गांडूळ खत निर्मिती प्रकल्प सुरू केला आहे. यासाठी त्याने हरियाणा राज्यातून ऑस्ट्रेलियन प्रजातीचे गांडूळ मागवले आहेत. या गांडूळाच्या माध्यमातून खत निर्मिती तसेच वर्मीवॉश हे फवारणी औषध तयार करण्यात येते. (Latest Marathi News)

या गांडूळ खताला मोठी मागणी आहे. या खत निर्मिती सोबतच पिकांवरील कीटकनाशकांचा  नायनाट करण्यासाठी वर्मीवॉश या फवारणी औषधाची देखील याठिकाणी विक्री केली जात आहे.

गांडूळ खत आणि वर्मीवॉश या औषधाच्या माध्यमातून प्रज्ञानंद पोहरे हा तरुण लाखो रुपयांची कमाई करीत आहे. त्याने केलेल्या प्रयोगामुळे राज्यभरात त्याच कौतुक होत आहे.