>> चेतन व्यास

Subodh Mohite Join Ajit Pawar Group: राष्ट्रवादीचे नेते आणि माजी केंद्रीय मंत्री सुबोध मोहिते यांनी शरद पवारांची साथ सोडली असून ते आता अजित पवार गटात सामील झाले आहेत. त्यांनी आज मुंबईत उपमुख्यमंत्री अजित पवार यांची भेट घेतली. अजित यांच्या नेतृत्वाचे कौतुक करत विदर्भातील विकासाच्या राजकारणात योगदान देणार असल्याचे त्यांनी सांगितले आहे.

माजी केंद्रीय मंत्री प्रफुल्ल पटेल यांच्या उपस्थितीत मोहिते यांनी विदर्भाच्या विकासासाठीही अजित पवार यांना साथ देणार असल्याचं सांगितलं.

कोण आहेत सुबोध मोहिते?

सुबोध मोहिते यांनी मे २०२१ मध्ये त्यांनी शरद पवार यांच्या नेतृत्वाखाली राष्ट्रवादी काँग्रेस पक्षात प्रवेश केला. शिवसेना, काँग्रेस, स्वाभिमान शेतकरी संघ, शिवसंग्राम अशा राजकीय पक्षामधून त्यांचा राजकीय प्रवास आतापर्यंत झाला आहे. (Latest Marathi News)

ज्येष्ठ नेत्यांशी जवळीक साधूनही ते राजकारणात स्वत:ला प्रस्थापित करू शकलेले नाहीत. मोहिते हे राजकारणातील महत्त्वाकांक्षी लोकप्रतिनिधी मानले जातात. ते सिव्हिल इंजिनिअर आहे. त्यांनी सरकारी निकारीही केली आहे. १९९५ मध्ये शिवसेना-भाजप युती सरकारच्या काळात ते तत्कालीन मंत्री महादेव शिवणकर यांचे खासगी सचिव होते.

वर्ष १९९९ मध्ये राष्ट्रवादीची स्थापना झाली. त्याच वर्षी मोहिते यांनी रामटेक मतदारसंघातून लोकसभा निवडणूक जिंकली. त्यांच्या विजयात राष्ट्रवादीचे उमेदवार पांडुरंग हजारे यांना मिळालेली मते महत्त्वपूर्ण ठरली.

बनवारीलाल पुरोहित यांचा पराभव झाला. अटलबिहारी वाजपेयी यांच्या नेतृत्वाखालील केंद्र सरकारमध्ये अवजड उद्योग मंत्री असलेले मोहिते यांनी नंतर शिवसेनेविरुद्ध बंड केले. नारायण राणेंसोबत त्यांनी काँग्रेसमध्ये प्रवेश केला. यानंतर लोकसभा आणि विधानसभा निवडणुकीत त्यांचा पराभव झाला.