नागपूर: वकील गुणरत्न सदावर्ते यांच्यावर यापूर्वीच कारवाई व्हायला हवी होती, असं राज्याचे मदत व पुनर्वसनमंत्री विजय वडेट्टीवार म्हणाले. गुणरत्न सदावर्ते यांच्यावर कारवाईसाठी खरं तर आमच्या सरकारला विलंब झाला, असंही ते म्हणाले. राष्ट्रवादीचे सर्वेसर्वा शरद पवार यांच्या घरावर झालेल्या हल्ल्यानंतर विजय वडेट्टीवारांनी ही प्रतिक्रिया दिली आहे. (ST Workers Protest Vijay Wadettiwar says we delayed taking action against Advocate Gunaratna Sadavarte).

"ॲडव्होकेट सदावर्ते (Gunratan Sadavarte) यांच्यावर यापूर्वीच कारवाई व्हायला हवी होती. सदावर्ते यांच्यावर कारवाईसाठी आमच्या सरकारचा विलंब झाला. गुणरत्न सदावर्ते यांनी एसटी कर्मचाऱ्यांना भडकवलं आहे. सदावर्ते यांच्यामुळे एसटी कर्मचाऱ्यांचं (ST Workers) नुकसान झालं आहे. सदावर्ते यांच्यावर झालेली कारवाई सौम्य आहे, अधिक कडक कारवाई व्हायला हवी", असं विजय वडेट्टीवार (Vijay Wadettiwar) म्हणाले.

तसेच, यामागे कोणाचा कट आहे, हा तपासाचा भाग आहे असंही ते म्हणाले. याप्रकरणात पोलीस चुकले आहेत. याबाबत गृह विभागाकडून चौकशी व्हावी, दोषींवर कारवाई होईल, असं आश्वासनही त्यांनी दिलं आहे.

शरद पवारांच्या घरावर आंदोलकांचा हल्ला

शरद पवार (Sharad Pawar) यांच्या मुंबईतील सिल्व्हर ओक बंगल्यावर काल एसटी आंदोलकांनी (ST Protest) हल्ला केला. त्यानंतर मोठ्या प्रमाणात गोंधळ उडाला. आंदोलकांनी शरद पवारांच्या घरावर दगडफेकही केली, चपलाही फेकल्या. यावेळी आंदोलकांना नियंत्रित करण्यासाठी पोलिसांचा मोठा फौजफाटा तिथे पोहोचला. त्यानंतर पोलिसांनी परिस्थितीवर नियंत्रण मिळवलं. त्यानंतर पोलिसांनी कारवाई करत ॲडव्होकेट गुणरत्न सदावर्ते यांना अटक केली आहे.

Edited By - Nupur Uppal