सोलापूर : सोलापुरात एका कुटुंबासोबत धक्कादायक घटना घडली आहे. सोलापुरात रविवारी गॅस गळतीमुळे ५ जणांचं कुटुंब घरात बेशुद्ध अवस्थेत आढळलं. पोलिसांना ही बाब कळताच कुटुंबातील सदस्यांना तातडीने रुग्णालयात दाखल करण्यात आलं. रुग्णालयात दाखल करण्यात आलेल्या एकाच कुटुंबातील तिघांना डॉक्टरांनी मृत घोषित केलं. सोलापुरातील लष्कर भागात घडलेल्या घटनेने परिसरात खळबळ उडाली आहे.

मिळालेल्या माहितीनुसार,सोलापुरातील लष्कर भागातील धक्कादायक घटना समोर आली आहे. सोलापुरात काल एका घरात गॅस गळती झाली. गॅस गळतीमुळे घरात 5 जणांचं कुटुंब बेशुद्ध अवस्थेत आढळलं. कुटुंबातील सदस्यांना रुग्णालयात दाखल केल्यानंतर त्यातील तीन जणांचा दुर्दैवी मृत्यू झाला. या घटनेत गॅस गळतीमुळे श्वास गुदमरल्यामुळे चिमुकल्या बहिणभावासह आजीचाही मृत्यू झाल्याचा प्राथमिक अंदाज व्यक्त करण्यात आला आहे.

नेमकं काय घडलं?

पाच जणांच्या या कुटुंबात शनिवारी माध्यरात्री घरगुती एलपीजी गॅस गळती झाल्यामुळे कुटुंबातील पाचही लोक अंत्यवस्थ होते. एलपीजी गॅसमुळे या कुटुंबातील सदस्यांच्या शरीरात कार्बनडायऑक्साईडचे प्रमाण वाढलं. त्यामुळे त्यांचं फुफ्फुस निकामी झाल्याने त्यांचा मृत्यू झाल्याचा अंदाज डॉक्टरांनी व्यक्त केला. आम्ही त्यांना वाचवण्याचा आटोकाट प्रयत्न करत आहोत. मात्र यातील 3 जणांचा मृत्यू झाला आहे. तर आणखी एक जण अंत्यवस्थ आहे, असेही डॉक्टरांनी सांगितलं.

हर्ष बलरामवाले (6), अक्षरा बलरामवाले (4), विमल मोहनसिंग बलरामवाले (60) या तिघांचा दुर्दैवी मृत्यू झाला आहे. तर युवराज मोहनसिंग बलरामवाले (वय 40), रंजना युवराज बलरामवाले (35) यांच्यावर उपचार सुरू आहेत. पुढील तपास सदर बाजार पोलिस स्टेशनचे अधिकारी करत आहेत. प्राथमिक अंदाजानुसार, घरातील एलपीजी गॅस गळतीमुळे गुदमरून कुटुंब बेशुद्ध झाले. या घटनेची माहिती मिळताच पोलिसांनी घटनास्थळी धाव घेतली. त्यानंतर संपूर्ण प्रकार उघडकीस आला. या घटनेमुळे सोलापूरच्या लष्कर परिसरात हळहळ व्यक्त केली जात आहे.