विश्वभूषण लिमये

Solapur News:

नवरात्रोत्सवात दांडिया फेस्टिव्हलला रीलस्टार अभिनेत्रीशी गैरवर्तन केल्याची घटना घडली होती. याप्रकरणी रीलस्टारने पोलिसांत तक्रार दाखल केली आहे. दाखल तक्रारीनुसार पोलिसांनी आरोपीच्या मुसक्या आवळल्यात. पोलिसांनी आरोपीला ताब्यात घेऊन त्याची चौकशी करत त्याला समज देऊन सोडून दिले आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या प्रकरणी पोलिसांनी दिलेल्या अधिक माहितीनुसार, सोलापुरात नवरात्रोत्सवात २२ ते २६ ऑक्टोबर या कालावधीत हरिभाई देवकरण प्रशालेच्या मैदानावर 'दुर्गाष्टमी दांडिया फेस्टिव्हल'चे आयोजन केले होते. २२ ऑक्टोबर रोजी या कार्यक्रमासाठी रीलस्टार अभिनेत्रीला बोलावण्यात आले होते. या कार्यक्रमात रीलस्टारचा विनभंग करण्याच्या उद्देशाने तिच्याशी अश्लील हावभाव करण्यात आले.

आरोपींमध्ये माजी नगरसेवकांच्या मुलासह अन्य तीघांवर रीलस्टारने आरोप केले आहेत. आरोपींनी तिच्याबद्दल सोशल मीडियावर अश्लिल पोस्ट देखील शेअर केली होती, अशीही तक्रार पोलिसांत देण्यात आलीये. २६ ऑक्टोबर रोजी सदर बझार पोलीस ठाण्यात तक्रार नोंदवण्यात आली होती.

या घटनेनंतर कार्यक्रमासाठी आलेल्या रीलस्टार अभिनेत्रीने महिला आयोगाकडेही तक्रार केली. त्यानुसार पोलीस आयुक्तालयाकडे पत्र प्राप्त झाले. पुढे पोलीस उपायुक्त विजय कबाडे यांनी कारवाईचे आदेश बजावताच सदर बझार पोलिसांनी गुंगारा देणाऱ्या आरोपीला ताब्यात घेऊन नोटीस बजावून पुन्हा असे कृत्य करणार नाही, अशी समज नोटिसीद्वारे देऊन सोडून देण्यात आले आहे.