स्थानिक स्वराज्य संस्थेच्या निवडणुकीच्या दरम्यान महायुतीमध्ये मोठी इनकमिंग सुरूय. याच दरम्यान एका राजकीय बातमीमुळे सोलापूरसह राज्याचं राजकारणात मोठी उलटफेर होणार आहे. महापालिका निवडणुकीनंतर काँग्रेस खासदार प्रणिती शिंदे ह्या भाजपमध्ये जाणार आहेत. खासदार शिंदे आणि मुख्यमंत्री देवेंद्र फडणवीस यांच्याशी त्यांची डील झालीय असा दावा वंचित बहुजन आघाडीचे युवा नेते सुजात आंबेडकर यांनी केलाय. या दाव्यामुळे सोलापूरसह राज्यातील राजकारणात एकच खळबळ उडालीय.

वंचित बहुजन आघाडीने सोलापूर महापालिकेसाठी २२ उमेदवार निवडणुकीत रिंगणात उतरवलेत. त्यांच्या प्रचारार्थ सुजात आंबेडकर यांनी आज सोलापुरात सभा घेतली. या सभेत बोलताना सुजात आंबेडकर यांनी पुन्हा एकदा खासदार प्रणिती शिंदे यांच्यावर आरोप केले. याशिवाय प्रणिती शिंदे भाजपमध्ये जाणार असल्याचा दावा त्यांनी यावेळी केलाय.

वंचित बहुजन आघाडीच्या विरोधात भाजप आहे. जर आरएसएसही असते तर त्यांनाही निवडणुकीत पराभूत केलं असत. आपल्या विरोधात भाजप आहे आणि दुसऱ्या बाजूलाही भाजपच आहे. कारण खासदार प्रणिती शिंदे याही भाजपसाठी काम करतात,असा दावाही सुजात आंबेडकर यांनी आपल्या भाषणावेळी केला.

त्या महापालिकेच्या निवडणुकीनंतर भाजपमध्ये प्रवेश करणार असल्याचा दावाही त्यांनी केला. स्थानिक स्वराज्य संस्थांच्या निवडणुकीच्या अगोदरच खासदार प्रणिती शिंदे भाजपमध्ये प्रवेश करणार होत्या. ऑक्टोबर महिन्यातच त्या प्रवेश करणार होत्या.

मात्र देवेंद्र फडणवीस यांनी शिंदेंना थांबायला सांगितलं. तीन महत्वाच्या निवडणुका येतायत, नगरपालिका, महानगरपालिका आणि जिल्हा परिषदेच्या निवडणुका येतायत. तुम्ही तोपर्यंत काँग्रेसमध्येच थांबा आणि सेटिंग करून भाजपचे सर्व उमेदवार निवडून आणा, अशी डील त्यांच्यात झालीय. त्यामुळे त्या निवडणुकीनंतर भाजपमध्ये प्रवेश करतील असं सुजात आंबेडकर म्हणाले. त्यामुळे भाजपला पराभूत करायचे असेल, तर वंचित बहुजन आघाडी हा एकमेव पर्याय तुमच्या समोर आहे, असे त्यांनी उपस्थित लोकांना संबोधताना सांगितलं.

दरम्यान प्रणिती शिंदे यांचे भाजपसोबतचे नातं खूप आधीपासूनचं आहे. गेल्या २ ते ३ महिन्यांपूर्वी सुशीलकुमार शिंदे यांची नात दिया श्रॉफ हिच्या लग्नात शरद पवार, गौतम अडाणी आणि देवेंद्र फडणवीस हे तीन प्रमुख पाहुणे होते.