विश्वभूषण लिमये, साम टीव्ही, प्रतिनिधी

वैष्णवी हगवणे या विवाहितेच्या मृत्यू प्रकरणामुळे राज्यभरात संतापाची लाट उसळली आहे. हुंड्यापायी सासरच्या मंडळींनी वैष्णवीचा छळ केला, तिला मारहाण केली. हे प्रकरण ताजं असताना घरगुती हिंसाचाराची बातमी सोलापूरमधून समोर आली आहे. पीडित महिलेला दीर आणि जाऊ यांच्याकडून मारहाण करण्यात आली होती. मागील दहा दिवसांपासून सोलापुरातील सिव्हिल रुग्णालयात महिलेवर उपचार सुरु आहेत.

मिळालेल्या माहितीनुसार, मारहाण झालेल्या विवाहित महिलेचे नाव चित्रा सतीश भोसले असे आहे. दीर संतोष भोसले, निलेश भोसले आणि जाऊ निलीता संतोष भोसले, पूजा निलेश भोसले यांनी मिळून चित्राला काठी, रॉडच्या सहाय्याने मारहाण करत विष पाजण्याचा प्रयत्न केला. पीडितेच्या शरीरावर अनेक ठिकाणी मारल्याचे व्रण आहेत. मारहाणीत चित्राचा कानाचा पडदा फाटल्याचा आरोप तिच्या नातेवाईकांनी केला आहे. चित्रा भोसलेचे दीर आणि जाऊ यांच्या विरोधात टेंभुर्णी पोलीस ठाण्यात फिर्याद दिल्यानंतर १४ मे रोजी गुन्हा दाखल करण्यात आला. पण या प्रकरणात पोलीस दिरंगाई दाखवत आहेत, आरोपी अजूनही फरार आहे, असा आरोप नातेवाईकांनी केला आहे.

२००७ मध्ये चित्रा भोसले हिचा विवाह सतीश भोसलेशी झाला होता. त्यानंतर हुंड्यासाठी चित्राला सासरकडच्यांनी त्रास दिला. २०१४ मध्ये सासरच्या मंडळींच्या विरोधात ४९८ कलम अंतर्गत गुन्हा दाखल करण्यात आला होता. दोन वर्षानंतर भोसले कुटुंबियांनी चित्राला नांदवण्यासाठी लेखी हमी दिली. तेव्हा चित्रा सासरी राहण्यासाठी गेली होती. पण दीर आणि जाऊ यांनी पुन्हा चित्राला त्रास द्यायला सुरुवात केली. चित्राला जीवे मारण्याचा प्रयत्न केल्याचा आरोप नातेवाईकांनी केला आहे. तिचा दीर आणि जाऊ यांच्या विरोधात वाढीव कलम लावून अटक व्हावी अशी मागणी चित्राचे वडील आणि भाऊ यांनी केली आहे.