राज्यात उन्हाळ्यात वीजेचा वापर वाढला आहे. नवी मुंबई, पनवेल भागात वीज खंडित होण्याचेही प्रकार वाढले आहेत. वीज खंडीत होण्याचे प्रकार वाढल्याने नागरिकांनी महावितरणच्या कार्यालयातही आंदोलन केलं आहे. 'महवितरण'च्या कारभाराविरोधात ग्राहकांकडून संताप व्यक्त केला जात आहे. दुसरीकडे मात्र 'महावितरण'ने 48 तासांत स्मार्ट मीटर बदलण्याचा मेसेज ग्राहकांना पाठवला आहे. यामुळे ग्राहकांमध्ये उलटसुलट चर्चा सुरू झाली आहे.

महावितरणने प्रत्येक ग्राहकांना वीज मीटर बदलणार असल्याचे मेसेज पाठवण्यास सुरूवात केली आहे. तुमच्याकडे स्मार्ट मीटर नसेल, तर ४८ तासांत सध्याचे मीटर बदलून त्याऐवजी स्मार्ट मीटर बसवण्यात येणार असल्याचे महावितरणकडून सांगण्यात आलं आहे. मीटर बदलण्यासाठी कोणतंही शुल्क आकारण्यात येणार नसल्याचे स्पष्ट केलं आहे.

तत्पूर्वी, मुख्यमंत्री फडणवीस यांनी राज्यात कुठेही बळजबरीने स्मार्ट मीटर बसवण्यात येणार नसल्याचे जाहीर केले होते. त्यानंतरही महावितरणने ग्राहकांना मेसेज पाठवून मीटर बदलणार असल्याचे सांगितले आहे.

'महावितरणने व्हाट्सअॅपवर काय मेसेज पाठवला?

महवितरणाचा मेसेज जसाचा तसा

प्रिय उपभोक्ता,

भारत सरकारने दि.१७.०८.२०२१ रोजी जारी केलेल्या राजपत्र अधिसूचनेनुसार, जर तुमचे मीटर 'स्मार्ट मीटर' नसेल, तर हा संदेश मिळाल्यापासून ४८ तासांनंतर MSEDCL (महावितरण) किंवा त्यांच्या अधिकृत प्रतिनिधींद्वारे तुमचे सध्याचे मीटर बदलून त्याऐवजी 'स्मार्ट मीटर' बसविण्यात येणार आहे. कृपया नोंद घ्यावी की, हा संदेश तुमचे सध्याचे मीटर बदलण्याबाबतची पूर्वसूचना आहे. स्मार्ट मीटरचे फायदे खालीलप्रमाणे आहेत:

१) यामुळे मानवी हस्तक्षेपाशिवाय अचूक बिलिंग होते.

२) मोबाईल ॲपद्वारे तुम्ही तुमच्या विजेचा वापर आणि बिल यांवर लक्ष ठेवू शकता व ते नियंत्रित करू शकता.

३) घरगुती ग्राहकांना सौरऊर्जा उपलब्ध असलेल्या वेळेत (Solar Hours) प्रति युनिट ८५ पैशांची सवलत मिळेल.

४) मीटर बदलण्याची प्रक्रिया पूर्णपणे मोफत आहे. आपणास सहकार्य करण्याची आणि या सुविधेचा लाभ घेण्याची नम्र विनंती आहे.