संजय जाधव, बुलढाणा प्रतिनिधी

बुलढाण्यातून धक्कादायक प्रकार उघडकीस आला आहे. शालेय विद्यार्थ्यांना प्रधानमंत्री पोषण शक्ती निर्माण योजनेतून शालेय पोषण आहार देण्यासाठी शासनाचे काही नियम आहेत. मात्र बुलढाणा जिल्हा परिषद शाळेत शासनाचे हे नियम धाब्यावर बसवत मुलांना शालेय पोषण आहार रद्दी पेपरवर देण्यात येत असल्याचा व्हिडिओ समोर आला आहे. याशिवाय या मुलांच्या अवतीभवती श्वान फिरत असल्याचं देखील पाहायला मिळालं आहे.

आधीच जिल्हा परिषद शाळेची पट संख्या मोठ्या प्रमाणात घटत असताना बुलढाणा जिल्ह्यातील संग्रामपूर तालुक्यातील बावनबीर या आदिवासी भागातील प्राथमिक शाळेतील विद्यार्थ्यांच्या जीवाशी कसा खेळ केला जात आहे याचा धक्कादायक व्हिडिओ साम टीव्हीच्या हाती आला आहे. प्राथमिक शाळेतील विद्यार्थ्यांना प्रधानमंत्री पोषण शक्ती निर्माण योजनेतून शालेय पोषण आहार देण्यासाठी मोठी नियमावली शासनाने तयार केली आहे. मात्र नियमावली धाब्यावर बसवून आदिवासी भागातील विद्यार्थ्यांच्या जीवाशी खेळ शाळा प्रशासन करत आहे.

प्राथमिक शाळेतील मुलांना सकस पोषण आहार देताना मोठी काळजी घेण्याच्या सूचना असताना ही या मुलांना चक्क रद्दी पेपर वर खिचडी दिल्या जात आहे. तर मुलं पोषण आहार घेत असताना चक्क श्वान त्यांच्या भोवती फिरताना दिसत आहेत. खर तर या चिमुकल्यांना पोषण आहार देण्यासाठी प्रत्येक शाळेला शासनाने स्टीलच्या प्लेट उपलब्ध करून दिल्या आहेत. मात्र स्टीलच्या प्लेटमध्ये पोषण आहार न देता रद्दी पेपरवर पोषण आहार दिल्या जात असल्याने मुलांच्या आरोग्यावर परिणाम होऊ शकतो तर मुलं पोषण आहार खाताना त्यांच्या अवतीभवती श्र्वानांचा मुक्त संचारही दिसत आहे.

मुख्याध्यापक आणि कर्मचारी आदिवासी विद्यार्थ्यांच्या जीवाशी कसं खेळतायेत हे या धक्कादायक घटनेतून समोर आलंय. याबाबत जिल्हा शिक्षणाधिकारी विकास पाटील यांना विचारणा केली असता त्यांनी याबाबत चार महिन्यांपूर्वी मी जिल्ह्यातील सर्व शाळांना कडक आदेश दिले होते अस ते म्हणाले. मात्र अशा प्रकारे विद्यार्थ्यांना सकस पोषण आहार दिल्या जात असेल तर आणि काही अनुचित प्रकार घडला तर जवाबदारी कुणाची? असा प्रश्न आता उपस्थित राहत आहे. अतिशय धक्कादायक हा प्रकार असून शालेय शिक्षणमंत्री यावर कारवाई करतील का? यामुळे मात्र पालकांत संताप निर्माण होत आहे.