Summary -

• कोल्हापूर जिल्ह्यात १० वर्षीय मुलाचा हृदयविकाराने मृत्यू

• श्रावण गावडे आईच्या कुशीत प्राण सोडले

• खेळताना अचानक अस्वस्थ झाल्याने घरी धावत आला

• रुग्णालयात नेण्याआधीच डॉक्टरांनी मृत घोषीत केले

रणजित माजगावकर, कोल्हापूर

कोल्हापुरमधून मन हेलावून टाकणारी घटना समोर आली आहे. १० वर्षांच्या मुलाचा हृदयविकाराच्या तीव्र झटक्याने मृत्यू झाला. कोल्हापूर जिल्ह्यातल्या कोडोली गावामध्ये ही धक्कादायक घटना घडली. या घटनेमुळे जिल्ह्यात एकच खळबळ उडाली. खेळताना अस्वस्थ वाटत असल्यामुळे हा चिमुकला धावत धावत घरी आला. आईने त्याला जवळ घेतले असता या चिमुकल्याने आईच्या मांडीवर प्राण सोडले.

मिळालेल्या माहितीनुसार, कोल्हापुरमध्ये हृदयविकाराच्या धक्क्याने १० वर्षीय निरागस मुलाचा दुर्दैवी अंत झाला. खेळता खेळता आईच्या मांडीवरच श्रावण गावडे या मुलाने प्राण सोडले. कोल्हापूर जिल्ह्यातल्या कोडोली गावात ही हृदयद्रावक घटना घडली. मित्रांसोबत गणेश मंडळाच्या मंडपात श्रावण गावडे खेळत होता. अचानक अस्वस्थ वाटू लागले आणि खेळ सोडून तो घरी पळत आला. आईच्या कुशीत डोकं टेकत श्रावणने प्राण सोडले. आईच्या कुशीतच त्याने डोळे मिटले.

श्रावणला त्याच्या कुटुंबीयांनी तात्काळ रुग्णालयात नेले. पण उपचारापूर्वीच डॉक्टरांनी त्याला मृत घोषीत केले. श्रावणचा हृदयविकाराच्या तीव्र झटक्याने मृत्यू झाल्याचे सांगण्यात आले. श्रावणच्या मृत्यूमुळे त्याच्या कुटुंबीयांना मोठा धक्का बसला. या घटनेमुळे कोडोलीतील आनंदनगर वसाहतीवर शोककळा पसरली आहे. श्रावणच्या आईचे रडून रडून बेहाल झाले आहे. श्रावण गावडे हा चौथीमध्ये शिकत होता. अभ्यासामध्ये तो खूप हुशार होता.