सचिन कदम, रायगड|ता. २८ जुलै २०२४

राज्यात विधानसभा निवडणुकांचे वारे वाहू लागले असतानाच महायुतीमधील वाद टोकाला गेला आहे. रायगड जिल्ह्यामध्ये लोकसभेला राष्ट्रवादी काँग्रेस अजित पवार गटाने महायुतीचा धर्म पाळला गेला नाही असे म्हणत शिवसेना शिंदे गटाचे आमदार महेंद्र थोरवे यांनी सुनील तटकरेंसह राष्ट्रवादीला खडेबोल सुनावले आहेत.

शिंदे गट अन् अजित पवारांच्या राष्ट्रवादीत ठिणगी!

याबाबत सविस्तर माहिती अशी की, रायगड जिल्ह्याचे शिवसेना शिंदे गटाचे जिल्हाप्रमुख प्रमोद घोसाळकर यांच्या वाढदिवसानिमित्त कार्यक्रमाचे आयोजन करण्यात आले होते. या कार्यक्रमाला शिवसेना शिंदे गटाचे आमदार महेंद्र थोरवे, आमदार भरत गोगावले आदी नेते उपस्थित होते. यावेळी बोलताना महेंद्र थोरवे यांनी राष्ट्रवादीचे प्रदेशाध्यक्ष सुनील तटकरे यांच्यावर जोदरार हल्लाबोल केला.

काय म्हणाले महेंद्र थोरवे?

रायगड मतदार संघामध्ये सगळ्या आमदारांनी एकत्रित काम केले म्हणून विजय संपादन करण्यात आला. मात्र राष्ट्रवादीकडून युतीधर्म पाळण्यात आला नाही. लोकसभा निवडणुकीत मावळ मतदारसंघात राष्ट्रवादीने आमच्या उमेदवाराचे काम केले नाही जाहीरपणे त्यावेळीच आमच्या खासदारांनी सांगितले आहे, असं थोरवे म्हणाले.

तसेच "कर्जतमध्ये विधानसभेसाठी राष्ट्रवादीकडून उमेदवार घोषित झाला आहे. महायुती असतानाही लपंडाव, पाठीत वार करण्याचे काम सुरू झाले आहे. महाड मतदार संघ आम्ही कसाही खेचून आणूच, पण गद्दारी कराल तर आम्ही श्रीवर्धनमध्ये शिवसेनेचा उमेदवार उभा करू, राष्ट्रवादी महायुतीचा धर्म पाळत नाही, त्यांची कुटनीती आम्ही ओळखून आहोत," असे म्हणत महेंद्र थोरवे यांनी राष्ट्रवादीला थेट इशारा दिला आहे.