सचिन बनसोडे 

शिर्डी (अहिल्यानगर) :  भारत पाकिस्तान युद्धाच्या पार्श्वभूमीवर भाविकांना साई मंदिरात फुल, हार, प्रसाद नेण्यास बंदी घालण्यात आली होती. मात्र परिस्थिती सामान्य होऊनही ही बंदी कायम असल्याने बंदी उठणार कधी? अशा आशयाची बातमी साम टिव्हीने चार दिवसांपूर्वी प्रसारित केली होती. यानंतर अखेर आज ही बंदी उठवण्यात आल्याने साईभक्तांमध्ये आनंदाचे वातावरण आहे.

भारत- पाकिस्तान यांच्यातील युद्धजन्य परिस्थितीच्या पार्श्वभूमीवर देशातील महत्वाच्या मंदिरांना हाय अलर्ट देण्यात आला होता. खबरदारीचा उपाय म्हणून भाविकांना साईबाबा मंदिरात फुल, हार, प्रसाद नेण्यास बंदी घालण्यात आली होती. येथे येणाऱ्या प्रत्येक भाविकांची कसून तपासणी करत फुल, हार, प्रसाद मंदिराच्या प्रवेशद्वारावरच जमा करून घेतला जात होता. मात्र युद्धजन्य परिस्थिती निवारल्यानंतर अर्थात परिस्थिती सामान्य होऊन अनेक दिवस उलटले. तरीही साई मंदिरात बंदी कायम होती. 

सामच्या बातमीनंतर बंदी मागे 

दरम्यान चार दिवसांपूर्वीच साम टिव्हीने साई मंदिराच्या प्रवेशद्वारावरून आढावा घेत साईभक्तांच्या भावना जाणून घेत ही बंदी उठणार कधी? असा सवाल उपस्थित करत बातमी प्रसारित करण्यात आली होती. अखेर ही बंदी आजपासून उठवण्यात आली असून साईभक्तांमध्ये आनंदाचे वातावरण दिसून येत आहे. मंदिर संस्थानने बंदी उठविली असली तरी काही नियमावली लावण्यात आली आहे. 

फुल - प्रसाद मंदिरात नेण्यासाठी नवीन नियमावली
दरम्यान फुल, हार, प्रसाद मंदिरात नेण्यास परवानगी देण्यात आली असली, तरी या संदर्भात काही नवीन नियमावली करण्यात आली आहे. साई संस्थान एम्लपॉइज क्रेडिट सोसायटी मार्फत फुल, हार, प्रसाद विक्री सुरू करण्यात आली आहे. याठिकाणी भाविकांना रितसर बिल पावती देऊन फुल, प्रसाद देण्यात येतो. ही पावती मंदिराच्या प्रवेशद्वारावर दाखवली; तरच भाविकांना पूजेचे सामान मंदिरात नेता येणार आहे. ज्या भाविकांकडे पावती नसेल त्यांना मज्जाव केला जातो. खाजगी दुकानदारांचे दर निश्चित नसल्याने ते भाविकांना कुठलीही पावती देत नाही. त्यामुळे बाहेरील खाजगी दुकानदारांकडून फुल, हार, प्रसाद विकत घेणाऱ्यांची मोठी अडचण झाली आहे. भाविकांची फसवणूक टाळण्यासाठी खाजगी फुल, प्रसाद विक्रेत्यांसाठी प्रशासनामार्फत नवीन नियमावली तयार केली जाणार आहे.