सातारा, ता. १६ सप्टेंबर २०२४

Mahesh Shinde Vs Shashikant Shinde: शशिकांत शिंदे हे राज्य सरकारच्या जमीन घोटाळ्यातील फरार गुन्हेगार आहेत, त्यांनी पोलिसांना नैतिकता शिकवू नये असे म्हणत कोरेगाव विधानसभा मतदार संघाचे आमदार, शिवसेना शिंदे गटाचे नेते महेश शिंदे यांनी राष्ट्रवादी शरदचंद्र पवार पक्षाच्या नेत्यांवर घणाघाती टीका केली आहे. साताऱ्यामध्ये ते पत्रकारांशी बोलत होते. महेश शिंदे यांच्या या टीकेमुळे साताऱ्यात विधानसभेआधीच राजकीय वातावरण चांगलेच तापण्याची चिन्हे निर्माण झाली आहेत.

काय म्हणालेत महेश शिंदे?

राज्याच्या राजकारणात विधानसभा निवडणुकांचे वारे वाहू लागले आहेत. निवडणुका तोंडावर आल्याने राजकीय कुरघोड्यांसह टीका- टिपण्यांना जोर आला आहे. अशातच कोरेगाव विधानसभा मतदार संघाचे आमदार, शिवसेना शिंदे गटाचे नेते महेश शिंदे यांनी शरद पवार गटाचे आमदार शशिकांत शिंदे यांच्यावर गंभीर आरोप केलेत. शशिकांत शिंदे हे राज्य सरकारच्या जमीन घोटाळ्यातील फरार गुन्हेगार आहेत, त्यांनी पोलिसांना नैतिकता शिकवू नये, अशी टीका महेश शिंदे यांनी केली आहे.

शशिकांत शिंदे फरार आरोपी...

"शशिकांत शिंदे हे राज्य सरकारच्या जमिनींच्या अपहरातले मोठे, फरार गुन्हेगार असून त्यांनी पैशांचा अपहार केला आहे. या प्रकरणात त्यांना अजूनही या गुन्ह्यात जामिन मिळाला नाही त्यामुळे त्यांनी इतरांना नैतिकता शिकवू नये. त्यांनी आधी स्वत:च्या जामिनाचे बघावे आणि नंतर दुस-यांना नैतिकता शिकवावी," अशी टीका आमदार महेश शिंदे यांनी केली आहे.

CM शिंदेंचे कौतुक...

कोरेगाव मतदासंघाला २ टीएमसी पाणी देण्याचा निर्णय मुख्यमंत्री एकनाथ शिंदे आणि देवेंद्र फडणवीस यांनी घेतला होता. या निर्णयांनंतर उपसा सिंचन योजनांमधील महत्वाची उपसा सिंचन योजना समजली जाते त्या तासगाव उपसा सिंचन योजनेला मुख्यमंत्री यांनी जीआर काढून मान्यता दिली. याच्या माध्यमातून वर्णे, देगाव , राजेवाडी, निगडी, कारंडवाडी, देवकरवाडी या गावांचा अत्यंत जिव्हाळ्याचा प्रश्न सुटला असून हजारो हेक्टर जमिनीचे क्षेत्र सिंचनाखाली येणार आहे अशी माहिती आमदार महेश शिंदे यांनी दिली. तसेच या गावांच्या सिंचनाच्या पाण्याच्या मिटल्याचा आनंद होत असल्याचेही त्यांनी सांगितले.