Satara Politics News: राज्याच्या राजकारणात सध्या विधानसभा निवडणुकांचे वारे वाहू लागले आहेत. निवडणुकांच्या पार्श्वभूमीवर उमेदवारांमध्ये आत्तापासूनच आरोप- प्रत्यारोपाच्या फैरी झडत असल्याचे चित्र पाहायला मिळत आहे. अशातच 'आज माझ्या हातात बांधलेली राखी या लोकांच्या तोंडावर बांधा,' असे म्हणत लाडकी बहीण योजनेवरून शिवसेना शिंदे गटाचे आमदार महेश शिंदे यांनी विरोधकांवर निशाणा साधला आहे.

कोरेगाव तालुक्यातील जळगाव ग्रामस्थांच्या वतीने विविध विकासकामांचे उद्घाटन आणि आमदार महेश शिंदे यांचा सत्कार समारंभ आयोजित केलेला होता. यावेळी जळगाव येथे पंचक्रोशीतील महिलांनी नामदार महेश शिंदे यांना राखी बांधून त्यांच्या औक्षण केले. या वेळी बोलत असताना नामदार महेश शिंदे यांनी लाडकी बहीण योजनेवरून विरोधकांवर जोरदार टीका केली.

'लाडकी बहीण योजनेचे पैसे मिळण्यावरून विरोधक चुकीचा नॅरेटिव्ह पसरवत आहेत. आता या योजनेचा तिसरा हप्ता लाडक्या बहिणीच्या खात्यात जमा झाला आहे. त्यामुळे आता माझ्या हाताच्या राख्या बांधल्या आहेत त्या राख्या विरोधकांच्या तोंडावर आवळून बांधायची वेळ आली आहे म्हणजे ओरडणाऱ्या विरोधकांचे तोंड बंद होईल. आमच्या माता बहिणींचे आर्थिक स्थैर्य या लोकांना आता बघवत नाही," अशा शब्दात महेश शिंदे यांनी विरोधकांचा समाचार घेतला.

दरम्यान, कोरेगाव विधानसभा मतदार संघामध्ये शिवसेना शिंदे गटाचे आमदार महेश शिंदे यांची सत्ता आहे. तर त्यांच्याविरोधात राष्ट्रवादी काँग्रेस शरदचंद्र पवार पक्षाचे नेते, शशिंकात शिंदे यांची उमेदवारी निश्चित मानली जात आहे. २०१९च्या निवडणुकीत महेश शिंदे यांनी शशिकांत शिंदेंना धुळ चारत जायंट किलरची भूमिका बजावली होती. त्यामुळे यंदा विधानसभेच्या निवडणुकीसही लोकसभेतील पराभवाचा वचपा काढण्याचे आव्हान शशिकांत शिंदेंसमोर असेल.