ओंकार कदम, सातारा प्रतिनिधी

Satara Police action against Dolby systems during Ganesh Visarjan : गणेश विसर्जन मिरवणुकीत उच्च न्यायालय आणि राज्य शासनाच्या नियमांचे उल्लंघन करणाऱ्या डॉल्बी चालकांवर सातारा पोलिसांनी धडक कारवाई केली आहे. रस्त्यावर वाहतुकीस तसेच पादचाऱ्यांना अडथळा निर्माण करणाऱ्यांवर शाहूपुरी पोलीस ठाण्यात १२ आणि सातारा शहर पोलीस ठाण्यात ३, असे एकूण १५ गुन्हे नोंदवण्यात आले आहेत. या कारवाईत डॉल्बी साऊंड सिस्टीमसह ट्रॅक्टर, ट्रक आणि टेम्पो असा सुमारे २ कोटी २५ लाख रुपयांचा मुद्देमाल जप्त करण्यात आला आहे. पोलीस अधीक्षक निखील पिंगळे आणि अप्पर पोलीस अधीक्षक डॉ. वैशाली कडुकर यांच्या मार्गदर्शनाखाली ही कारवाई करण्यात आली.

साताऱ्यात डीजे-डॉल्बीविरोधात ज्येष्ठ नागरिकांचा मूक मोर्चा

साताऱ्यात गणपती विसर्जन मिरवणुकीत डीजे-डॉल्बीचा दणदणाट सुरू असतानाच, याविरुद्ध ज्येष्ठ नागरिक रस्त्यावर उतरले. डीजे आणि लेझर लाईटवर बंदीची मागणी करत ज्येष्ठ डॉक्टरांनी विसर्जन मिरवणुकीदरम्यान मूक मोर्चा काढत अनोख्या पद्धतीने निषेध नोंदवला. हातात निषेधाचे फलक धरून आणि मौन बाळगून त्यांनी प्रशासनाचे लक्ष वेधत ध्वनिप्रदूषणाविरोधात आवाज उठवला. त्याचबरोबर, सातारा पोलीस प्रशासनाने दिलेला शब्द पाळत ध्वनीची मर्यादा ओलांडणाऱ्या डीजेवर योग्य ती कारवाई केल्याबद्दल त्यांनी पोलीस प्रशासनाचे अभिनंदनही केले.

ज्येष्ठ नागरिकांची प्रतिक्रिया :

"प्रत्येक सणावेळी हे ज्येष्ठ नागरिक कुठे गेलेले असतात? सकाळी पहाटे पाच वाजता भोंगा सुरू होतो, त्यावेळी या ज्येष्ठ नागरिकांना त्या आवाजाचा त्रास होत नाही का? मात्र हिंदूंचा गणपती उत्सव आला की ज्येष्ठ नागरिकांना डीजे-डॉल्बीचा त्रास होतो. आम्हीसुद्धा ज्येष्ठ नागरिकांच्या सोबत आहोत; जिथे आवाजाच्या मर्यादेचे उल्लंघन होते, तिथे १००% डीजे बंद करा, पण आम्ही गणपती कसा घेऊन जायचा?" असा सवालही यावेळी उपस्थित करण्यात आला.

मंडळाच्या कार्यकर्त्यांची प्रतिक्रिया :

"आमच्या मंडळातील सुमारे ५०० महिला डीजेसमोर आनंद व्यक्त करत नाचत होत्या, त्यांना याचा काहीही त्रास झाला नाही. मात्र डीजे बंद केल्यामुळे या सर्व महिला नाराज होऊन निघून गेल्या. आमची कळकळीची विनंती आहे की, जर ९९% लोकांना डीजे लावून आनंद मिळत असेल आणि १% लोकांना त्रास होत असेल, तर आम्ही स्वखर्चाने त्या ज्येष्ठ नागरिकांना एका दिवसाच्या टूरसाठी बाहेरगावी पाठवतो," अशी प्रतिक्रिया मंडळाच्या कार्यकर्त्यांनी दिली.