ओंकार कदम, सातारा

फलटण शहरात पुन्हा एकदा ‘कोयता गँग’ची दहशत पाहायला मिळाली असून जिंती नाका परिसरात काही तरुणांनी भररस्त्यात कोयता उगारून दहशत माजवल्याची घटना समोर आली आहे. या घटनेचा CCTV व्हिडिओ सोशल मीडियावर मोठ्या प्रमाणात व्हायरल होत असून नागरिकांमध्ये भीतीचे वातावरण निर्माण झाले आहे.

मिळालेल्या माहितीनुसार, जिंती नाका परिसरात सायंकाळ च्या सुमारास काही तरुणांनी हातात कोयते घेऊन रस्त्यावर धुडगूस घातला. यावेळी परिसरातील नागरिकांमध्ये घबराट पसरली होती. काही वाहनचालकांनीही भीतीपोटी आपला मार्ग बदलल्याचे सांगितले जात आहे. घटनेचा संपूर्ण प्रकार परिसरातील CCTV कॅमेऱ्यात कैद झाला असून संबंधित व्हिडिओ सोशल मीडियावर व्हायरल झाला आहे.

व्हिडिओमध्ये काही युवक हातात कोयते घेऊन उभे असल्याचे स्पष्ट दिसत आहे. या प्रकारामुळे फलटण शहरातील कायदा व सुव्यवस्थेचा प्रश्न पुन्हा ऐरणीवर आला आहे. दरम्यान, या प्रकरणी संबंधित तरुणांविरोधात पोलिसांत गुन्हा दाखल करण्यात आला असून पोलिसांकडून पुढील तपास सुरू आहे.

आरोपींचा शोध घेण्यासाठी विशेष पथक तैनात करण्यात आल्याची माहिती मिळत आहे. या घटनेनंतर नागरिकांकडून शहरात वाढत्या गुंडगिरीवर कठोर कारवाई करण्याची मागणी जोर धरू लागली आहे. फलटण शहरात वाढत चाललेल्या ‘कोयता गँग’च्या हालचालींमुळे पालकांमध्येही चिंतेचे वातावरण निर्माण झाले आहे.