ओंकार कदम, साम टीव्ही, प्रतिनिधी

Satara News : सातारा शहरामध्ये एक धक्कादायक प्रकार घडला आहे. सातारा वाहतूक शाखेच्या महिला पोलीस कॉन्स्टेबलला एका रिक्षाने फरफटत नेल्याची माहिती समोर आली आहे. या महिला कॉन्स्टेबलने रिक्षाचालकाला अटकाव केला होता. त्यानंतर चालकाने असे कृत्य केल्याची शक्यता वर्तवली जात आहे.

मिळालेल्या माहितीनुसार, साताऱ्यामध्ये रिक्षा चालकाने महिला पोलीस कॉन्स्टेबलला फरफटत नेले. ही घटना सातारा शहरातील खंडोबाचा माळ ते मनाली हॉटेल दरम्यान घडली आहे. या घटनेमुळे महिला पोलीस गंभीररित्या जखमी झाल्याचे म्हटले जात आहे. रिक्षा चालक दारूच्या नशेत असल्याची प्राथमिक माहिती मिळाली आहे.

महिला पोलीस कॉन्स्टेबलला फरफटत नेणाऱ्या रिक्षाचालकाने ६ ते ७ दुचाकी आणि चारचाकींना धडक दिली होती. तो दारूच्या नशेत टल्ली होता. त्याला अटकाव करण्याचा या महिला कॉन्स्टेबलने प्रयत्न केला. तेव्हा रिक्षाचालकाने त्यांना फरफटत नेले. या घटनेत महिला कॉन्स्टेबंल रक्तबंबाळ झाल्या असून त्यांच्यावर खासगी रुग्णालयात उपचारासाठी दाखल करण्यात आले आहे.

हा प्रकार एका दुकानाच्या सीसीटीव्ही कॅमेऱ्यामध्ये कैद झाला. सातारा शहरातील मध्यवर्ती ठिकाणी असलेल्या खंडोबा माळपासून मार्केट यार्डपर्यंतचा थरार सीसीटीव्हीमध्ये कैद झाला आहे. रिक्षाच्या मागे महिला कॉन्स्टेबलला फरफटत नेल्याने स्थानिक नागरिकांनी रिक्षा चालकाला चोप दिला. त्यानंतर सातारा पोलीस घटनास्थळी दाखल झाले.