ओंकार कदम, सातारा

साताऱ्यातील खेडमधून मोठी बातमी समोर आली आहे. खेड ग्रामपंचायतीच्या सरपंच लता फरांदे यांच्यावर तब्बल पावणे सतरा लाख रुपयांच्या कथित आर्थिक गैरव्यवहार केला असून त्यांना थेट निलंबित करण्यात आले आहे. पुणे विभागीय आयुक्त कार्यालयात पार पडलेल्या सुनावणीनंतर हा धडक निर्णय जाहीर करण्यात आला. या कारवाईमुळे खेडसह संपूर्ण तालुक्यात राजकीय वातावरण ढवळून निघाले आहे.

मिळालेल्या माहितीनुसार, सरपंच लता फरांदे यांच्याविरोधात गेल्या काही महिन्यांपासून ग्रामस्थ आणि विरोधी गटांकडून गंभीर आरोप करण्यात येत होते. ग्रामपंचायतीतील निधीचा अपव्यय, कामांमध्ये अनियमितता आणि अधिकारांचा गैरवापर केल्याच्या तक्रारी प्रशासनाकडे दाखल झाल्या होत्या. या तक्रारींची दखल घेत जिल्हा परिषद तसेच पंचायत समिती स्तरावर सखोल चौकशी सुरू करण्यात आली होती.

प्राथमिक तपासानंतर सादर करण्यात आलेल्या अहवालात अनेक बाबींमध्ये आर्थिक अनियमितता आढळून आल्याचे नमूद करण्यात आले होते. त्यानंतर फेरचौकशी करण्यात आली असता काही आरोप अधिक गंभीर असल्याचे स्पष्ट झाले. विशेषतः विकासकामांसाठी मंजूर झालेल्या निधीच्या वापरात पारदर्शकता नसल्याचे आणि नियमांचे उल्लंघन झाल्याचे निष्पन्न झाल्याची माहिती समोर आली आहे. फरांदे यांनी १६ लाख ७७ हजार १४३ गैरव्यवहार केल्याचे उघडकीस आले आहे.

या सर्व बाबींचा विचार करून विभागीय आयुक्तांनी सरपंच लता फरांदे यांना पदावरून निलंबित करण्याचा अंतिम आदेश दिला. या निर्णयामुळे ग्रामपंचायतीच्या कारभारावर मोठा परिणाम होण्याची शक्यता व्यक्त केली जात आहे. दरम्यान, या कारवाईनंतर खेड तालुक्यात राजकीय खळबळ उडाली असून विविध स्तरांवर प्रतिक्रिया उमटू लागल्या आहेत. आगामी काळात या प्रकरणाची पुढील चौकशी आणि त्यातून उघड होणारे तपशील याकडे सर्वांचे लक्ष लागले असून, ग्रामपंचायतीतील प्रशासन आणि पारदर्शकतेबाबत हा निर्णय महत्त्वाचा ठरणार आहे.