Jarange Patil: मराठा आंदोलक मनोज जरांगे पाटील यांनी बीड जिल्ह्यातील मस्साजोगमध्ये जात संतोष देशमुख कुटुंबाची भेट घेतली. संतोष देशमुख हत्या प्रकरणात आरोपी कृष्णा आंधळे अद्याप फरार आहेत. त्याला लवकरात लवकर अटक करण्यात यावी अशी मागणी त्यांनी केली आहे.

तसेच मंत्री धनंजय मुंडेंवर आरोप केले आहेत. 'चारशीटमध्ये छेडछाड होण्याची शक्यता आहे. यात मुंडे यांचा हात आहे. त्यांना टोळ्या सांभाळण्याचा नाद आहे', असा आरोप मनोज जरांगे पाटील यांनी केला आहे.

मुंडेंना सहआरोपी करा

'वाल्मिक कराड ज्या वाहनातून शरण गेले, ती गाडी पोलिसांनी झाकून ठेवली होती. यानंतर प्रशांत महाजन या पोलीस अधिकाऱ्याला सह आरोपी करण्यात आलं. शहर पोलीस ठाण्याचे पोलीस निरीक्षकांना देखील सह आरोपी करा, त्यांनी आंदोलन दडपलं होतं', असंं मनोज जरांगे पाटील म्हणालेत.

चारशीटमध्ये छेडछाड

'या ठिकाणी कारवाई पोलिसांकडून होत नाही. चारशीटमध्ये छेडछाड होण्याची शक्यता आहे. यात धनंजय मुंडे देखील आहेत. त्यांना टोळ्या सांभाळण्याचा नाद आहे. यातील आरोपी त्यांचेच आहेत. त्यामुळे त्यांना देखील सहआरोपी करा', अशी मागणी जरांगे पाटील यांनी केली आहे.

मस्साजोगचे ग्रामस्थ उपोषण करणार

जरांगे पाटील यांनी मस्साजोगमध्ये जात देशमुख कुटुंबाची भेट घेतली.यावेळी त्यांनी जिल्हाधिकारी अविनाश पाठक यांना फोन केला होता. यावेळी जिल्हाधिकारी यांनी सकारात्मकता दाखवल्याचं जरांगे पाटील म्हणाले.

'मस्साजोगचे ग्रामस्थ २५ तारखेला उपोषण करणार आहेत. हा विषय खूप संवेदनशील आहे. निवेदन असलं तरी सहकार्य करा', असं जरांगे पाटील म्हणाले.

तसेच 'संतोष देशमुख हत्या प्रकरणात सरकारी वकील उज्वल निकम यांची नियुक्ती करा, बाकीच्या आरोपींची सीडीआर काढा', अशी मागणी गावकरी आणि जरांगे यांनी जिल्हाधिकारी यांच्याकडे केली आहे.