मस्साजोगचे सरपंच संतोष देशमुख यांच्या हत्येच्या प्रकरणात आरोपी सुदर्शन घुले आणखी अडचणीत सापडला आहे. न्यायालयाने घुलेला ३१ जानेवारीपर्यंत पोलिस कोठडी सुनावली आहे. यापूर्वी तो न्यायालयीन कोठडीत होता. संतोष देशमुख हत्या प्रकरणातील आरोपींना १८ जानेवारी रोजी न्यायालयात हजर करण्यात आले. न्यायालयाने तपासासाठी आवश्यक शर्तींवर त्यांना पुन्हा पोलिस कोठडी देण्याऐवजी न्यायालयीन कोठडीत पाठवले. तपासात कोणताही नवीन मुद्दा समोर आलेला नाही.

तपास अधिकारी अपर पोलीस अधीक्षक किरण पाटील यांनी मांडलेले मुद्दे

- संतोष देशमुख हत्याकांडातील प्रमुख आरोपी सुदर्शन घुले याचा मोबाईलमधील डाटा तपासामध्ये हस्तगत करण्यात आला आहे आणि याच डाटा संदर्भात चौकशी करण्यासाठी सुदर्शन घुले याची पोलीस कस्टडी हवी आहे.

- यासोबतच एक दुसरा मोबाईल जो सुदर्शन घुले याचा पोलिसांच्या ताब्यात आहे. त्या मोबाईलचे लॉक अद्याप उघडलेले नाही आणि तेही उघडायचे आहे. त्याचा तपास करायचा आहे.

आरोपी वकील अनंत तिडके यांचा युक्तिवाद

यापूर्वीच तपास करत असताना जो डिजिटल इव्हिडन्स पोलिसांच्या हाती लागला आणि त्यातून असं सांगण्यात आलं की आरोपीच्या चेहऱ्यावर कोणतीही भीती अथवा पश्चाताप पाहायला मिळाला नाही. जर ही माहिती १४ दिवसांपूर्वीच पोलिसांकडे होती तर मग आता कोणता मोबाईल त्यांना ओपन करायचा आहे असा प्रति प्रश्न आरोपीचे वकील अनंत तिडके यांनी विचारला.

यासोबतच ज्या दिवशी संतोष देशमुख यांची हत्या झाली त्याच्या काही तासानंतरच पोलिसांनी जे वाहन ताब्यात घेतलं त्यातच मोबाईल आढळून आले होते. मग इतक्या दिवस हे मोबाईल जर पोलिसांच्या ताब्यात आहेत तर तो तपास आतापर्यंत का झाला नाही? असा प्रश्न सुद्धा यावेळी आरोपीच्या वकिलाने विचारला. दोन्ही बाजूचा युक्तिवाद ऐकत आरोपी सुदर्शन घुले याला ३१ जानेवारीपर्यंत एसआयटी कोठडी देण्यात आली आहे.