Santosh Deshmukh Case : पंकजा मुंडे यांनी डिसेंबर महिन्यात पर्यावरण मंत्री म्हणून पदभार स्वीकारला. त्यांनी आज (७ जानेवारी) पत्रकार परिषद घेतली. माध्यमांशी बोलताना त्यांनी विभागाच्या उपक्रमांची माहिती दिली. याच दरम्यान त्यांनी बीडच्या सरपंच हत्या प्रकरणावर भाष्य केले. त्यांनी बोलताना धनंजय मुंडे आणि वाल्मीक कराड यांचे नाव घेणे टाळले.

बीडच्या मस्साजोग गावचे सरपंच संतोष देशमुख हत्या प्रकरणामुळे महाराष्ट्राचे राजकारण तापले आहे. यामध्ये कथित स्वरुपात धनंजय मुंडे यांचे नाव घेतले जात आहे. तर खंडणी प्रकरणात आत्मसमर्पण करणारा वाल्मीक कराड हा हत्याप्रकरणाचा मास्टरमाईंड असल्याचे म्हटले जात आहे. याच पार्श्वभूमीवर पंकजा मुंडे यांना काही प्रश्न विचारण्यात आले.

प्रश्नांची उत्तरे देताना पंकजा मुंडे यांनी 'संतोष देशमुख हत्या प्रकरणी एसआयटीद्वारे चौकशी केली जावी यासाठी मी सर्वात आधी मुख्यमंत्री देवेंद्र फडणवीस यांना पत्र पाठवले होते. या विषयावर व्यक्त न होण्यामागचं काही कारण नाही. हत्याप्रकरणात कुणीही सहभागी असेल, तर त्यांच्यावर कारवाई केली जाईल असे मुख्यमंत्र्यांनी सांगितले आहे. तेव्हा सारखं तोच विषय चालू ठेवणं योग्य नाही. यावर सतत बोलल्याचा मुख्यमंत्र्यांवर, यंत्रणेवर विश्वास नाही, असा अर्थ होतो', असे विधान केले.

पंकजा मुंडे यांनी 'या प्रकरणात कोण कोण दोषी आहे, हे मला ठाऊक नाही. त्यामुळे मी कुणाच नाव घेणार नाही. जो दोषी असेल, त्याला शिक्षा झालीच पाहिजे', असे म्हणताना त्यांनी धनंजय मुंडे, वाल्मीक कराड यांचे नाव घेणे टाळले आहे. दरम्यान या प्रकरणामुळे बीडचे पालकमंत्रीपद पंकजा मुंडे किंवा अजित पवार यांच्याकडे जाऊ शकते अशी शक्यता वर्तवली जात आहे.