ऐकलंत...कुख्यात गुंड सचिन घायवळला गृहराज्यमंत्री योगेश कदमांनी शस्त्रपरवाना देण्याचा आदेश वादात सापडलाय. हाच धागा पकडून फडणवीस हे कॅबिनेट नाही तर गुंडांची टोळी चालवत असल्याचा खळबळजनक आरोप संजय राऊतांनी केलाय. त्यामुळे राजकीय वातावरण चांगलंच तापलंय.

खरंतर सचिन घायवळ हा कुख्यात गुंड निलेश घायवळचा भाऊ.निलेश घायवळ आणि सचिन घायवळ पुणे, अहिल्यानगर आणि धाराशिव जिल्ह्यात गँग चालवतात.अशा कुख्यात गँगस्टरच्या शस्त्रपरवाना देण्यासाठी नियमांची पायमल्ली केली असेल तर कारवाईचा इशारा देत अजित पवारांनी योगेश कदमांची कोंडी केलीय.

विरोधकच नाही तर सत्ताधारीही खिंडीत गाठायला लागल्याने योगेश कदमांनी थेट उपमुख्यमंत्री एकनाथ शिंदेंची भेट घेतलीय.यावेळी शिंदेंनी चुकीचं केलं नाही तर घाबरण्याचं कारण नाही, असं म्हणत कदमांची पाठराखण केलीय. दुसरीकडे मुख्यमंत्री देवेंद्र फडणवीसांनीही घायवळला शस्त्रपरवाना दिलाच नसल्याचं स्पष्ट केलंय.

खरंतर,आधी रोहित पवारांनी सचिन घायवळच्या शस्त्र परवान्यामागे विधान परिषदेचे सभापती राम शिंदे असल्याची शक्यता वर्तवली होती. तर रामदास कदमांनीही शस्त्रपरवाना प्रकरणी राम शिंदेंकडेच बोट दाखवलं.आता सचिन घायवळला शस्त्रपरवाना दिला नसल्याचं सांगत सत्ताधारी हात झटकत आहेत. मात्र 2 दिवसांपासून सचिन घायवळला शस्त्रपरवाना दिला की नाही? दिला असेल तर त्यासाठी कुणी शिफारस केली? यातील संदिग्धता कायम ठेवली जातेय.मात्र हे असं असलं तरी शस्त्रपरवान्याचे आदेश देऊन सर्वसामान्यांच्या मुळावर उठणाऱ्या गुंडांना पोसणारी राजकीय व्यवस्था आता उघडी पडत चाललीय.