अभिजीत सोनावणे

पंतप्रधान नरेंद्र मोदींनी (PM Narendra Modi) केंद्रसरकारच्या योजना देशातील नागरिकांपर्यंत पोहचवण्यासाठी जन आशिर्वाद यात्रेचे (Janashirvad Yatra) आयोजन केले आहे, पण राणे हे पंतप्रधान मोंदीचाही आदेश ऐकत नाहीत, भाजपाचही ऐकत नाहीत, केवळ राज्यसरकारवर टिका करुन अतिशहाणपणा करत आहेत, असे म्हणत शिवसेना खासदार संजय राऊत (Sanjay Raut) यांनी नारायण राणेंवर (Narayan Rane) पलटवार केला आहे. मुंबईत आयोजित एका सभेत ते बोलत होते.

हे देखील पहा-

यावेळी बोलताना संजय राऊत म्हणाले की, ''भाजपाने जेव्हा नारायण राणे यांना केंद्रिय मंत्रीपद दिले आहे, तेव्हापासून हा माणूस केवळ महाविकास आघाडी, उद्धव ठाकरे, संजय राऊत, विनायक राऊत, अंबादास दानवे यांच्यावर सातत्याने टिका करत आहेत. पण आमच्यावर बाळासाहेबांचे संस्कार आहेत. आम्हाला टिका सहन करण्याची सवय आहे. पण मंत्र्यांची भाषा सभ्य असावी. पण केंद्रिय मंत्री झाल्यापासून राणे सातत्याने राज्यसरकारवर टिका करत आहेत. ज्या दिवसापासून हे महाशय मंत्री झालेत तेव्हापासून हा पक्ष १० फुट मागे जातोय, आता भाजपाला आत्मपरिक्षण करण्याची वेळ आली आहे. असे म्हणत संजय राऊतांनी भाजपाला टोला लगावला आहे.

आम्हाला तुम्ही अजिबात धमक्या देण्याचा प्रयत्न करू नका. आम्ही तुमच्या बापाचे श्राद्ध घालू. आमच्या कुंडल्या काढण्याची धमकी देतात, काढा आमच्या कुंडल्या, तुम्हाला कुंडल्या नाहीत का? आम्ही पण तुमच्या संदूक काढू, तेव्हा पळता भुई थोडी होईल, असे म्हणत संजय राऊतांनी राणेंवर पलटवार केला आहे. संभाजीराजेंसोबत तुलना करतात किती हवा डोक्यात गेली, मुख्यमंत्री हे घटनात्मक पद आहे, त्याचा मान राखला गेला पाहिजे, पण जर मुख्यमंत्री पदाचा मान जर महाराष्ट्राचा माणूस राखणार नसेल तर तो मराठी माणूस नाही, असेही संजय राऊतांनी म्हटले आहे.

Edited By - Anuradha