भरत नागणे, साम टीव्ही

पंढरपूर: सांगोला पंचायत समितीमध्ये आज सकाळी शिवसेनेच्या पदाधिकाऱ्यांनी केलेल्या दादागिरीमुळे एकच खळबळ उडाली आहे. अधिकारी-कर्मचारी विश्वासात घेत नसल्याचा आरोप करत शिवसेनेचे उपसभापती अजय सरगर यांनी कर्मचाऱ्यांना कार्यालयातून बाहेर काढत पंचायत समितीचे कामकाज बंद पाडले. तब्बल दोन तासांपासून कार्यालयीन कामकाज ठप्प असल्याने ग्रामीण भागातून आलेल्या नागरिकांची मोठी गैरसोय होत आहे.

मिळालेल्या माहितीनुसार, सांगोला पंचायत समितीमध्ये गेल्या काही दिवसांपासून शिवसेना पदाधिकारी आणि प्रशासन यांच्यात तणावाचे वातावरण होते. विकासकामांच्या फाईल्स, ग्रामपंचायतींना निधी वाटप आणि विविध योजनांच्या अंमलबजावणीत अधिकारी शिवसेना पदाधिकाऱ्यांना विश्वासात घेत नसल्याचा आरोप उपसभापती अजय सरगर यांचा आहे.

आज सकाळी 11 वाजण्याच्या सुमारास उपसभापती अजय सरगर हे आपल्या कार्यकर्त्यांसह पंचायत समिती कार्यालयात दाखल झाले. त्यांनी थेट गटविकास अधिकारी आणि इतर शाखांच्या कर्मचाऱ्यांना जाब विचारला. वाद विकोपाला गेल्यानंतर सरगर यांनी कर्मचाऱ्यांना कार्यालयाबाहेर काढले आणि दारे बंद करून घेतली.

ऐन गर्दीच्या वेळी हे कामकाज बंद झाल्याने सांगोला तालुक्यातील विविध गावांमधून दाखले, घरकुल, रोजगार हमी योजना आणि इतर कामांसाठी आलेल्या शेकडो नागरिकांना ताटकळत बसावे लागले. दोन तासांपासून एकही फाईल हलत नसल्याने नागरिकांमध्ये संतापाचे वातावरण आहे.