Sangli Zilla Parishad News : सांगली जिल्हा परिषदेच्या तिसऱ्या मजल्यावरील महिला व बाल कल्याण विभागातील स्लॅबचा भाग अचानक कोसळला. या घटनेनंतर काेणालाही दुखापत झालेले नाही. दरम्यान एखाद्याचा बळी जाण्यापूर्वी जिल्हा परिषदेच्या इमारतीचे स्ट्रक्चरल ऑडिट करून धोकादायक भाग उतरवून घ्यावा अशी मागणी होऊ लागली आहे. (Maharashtra News)

सांगली जिल्हा परिषदेतील दुसरा आणि तिसरा मजला धोकादायक बनला आहे. चार दिवसांपूर्वी दुसऱ्या मजल्यावरील मुख्य सभागृहकडे जाणाऱ्या पोर्चचा काही भाग कोसळला होता.

शुक्रवारी (ता.11) तिसऱ्या मजल्यावरील महिला व बाल कल्याण विभागातील स्लॅबचा भाग कोसळला. याप्रसंगी या विभागातील एक महिला कर्मचारी प्रसंगावधान राखत बाजूला सरकल्याने मोठी दुर्घटना टळली.

सद्यस्थितीत महिला व बाल कल्याण विभागाचे नूतनीकरणाचे काम सुरू आहे. त्यामुळे कार्यालयीन काम हे लगतच्या पॅसेजमधून सुरू आहे. शुक्रवारी दुपारी या पॅसिज मधील स्लॅबचा काही भाग अचानक कोसळला.

या घटनेनंतर कर्मचाऱ्यांमध्ये भीतीचे वातावरण पसरले आहे. याबाबत उपमुख्यकार्यकरी अधिकारी संदीप यादव व इतर कर्मचाऱ्यांनी सीईओ तृप्ती धोडमिसे यांची भेट घेऊन कैफियत मांडली.

दरम्यान सद्यस्थितीत येथील कर्मचाही हे स्वतःचा जीव धोक्यात घालून काम करीत आहेत. त्यामुळे एखाद्याचा बळी जाण्याअगोदर जिल्हा परिषदेच्या इमारतीचे स्ट्रक्चरल ऑडिट करून धोकादायक भाग उतरवून घ्यावा अशी मागणी होत आहे.

Edited By : Siddharth Latkar