विजय पाटील

सांगली: जिल्ह्यातील जत तालुक्यातील मुचंडी  येथील श्रीधर कोळी यांचा नव्याने बांधण्यात आलेला ढाबा सोसायटी निवडणुकीत झालेल्या वादाच्या कारणातून पेटवून दिल्याची घटना घडली आहे. सोमवारी ता. 7 मार्च रोजी रात्री 11.30 वाजण्याच्या सुमारास घडली. या घटनेत कोळी यांचे 11 लाखांचे नूकसान झाले असून याबाबत जत पोलिस ठाण्यात श्रीधर कोळी यांनी सहा जणांविरोधात फिर्याद दिली आहे. (Sangli News Updates)

यामध्ये पोलिसांनी महांतेश नारायण मलमे, नारायण मलमे, दर्याप्पा मलमे, प्रकाश मलमे, प्रविणकुमार मलगोंडा पाटील, श्रीनिवास मलगोंडा पाटील, अशा सहा जणांविरोधात गुन्हा दाखल केला आहे.

हे देखील पहा-

मुचंडी सोसायटीची शनिवारी निवडणूक झाली आहे. काँग्रेस गटाच्या विरोधात राष्ट्रवादी काँग्रेस पुरस्कृत पॅनलने एक हाती सत्ता मिळवली. या निवडणुकीत झालेल्या पराभवानंतर सायंकाळी कोळी हे बस स्थानक जवळ उभारलेले असताना वरील संशयित आरोपींनी शिवीगाळ करत मारहाण केली. शिवाय, रात्री 8 वाजता घरी येऊन जीवे मारण्याची धमकी दिली. तसेच रात्री 11.30 वाजण्याच्या सुमारास कोळी यांच्या मालकीचा ढाबा पेटवून दिला. या घटनेचा अधिक तपास पोलिस करत आहेत.