सांगलीमध्ये दिवाळी सणाला गालबोट लागले आहे. फटाक्यांनी तरुणाचा जीव गेलाय. सांगलीच्या तासगावमध्ये घरासमोर फटाके फोडल्याच्या रागातून सख्ख्या भावांनी तरुणाची हत्या केली. येळावी गावामध्ये ही घटना घडली आहे. दीपक सुवासे असे मृत तरुणाचे नाव आहे. या घटनेमुळे सांगलीमध्ये खळबळ उडाली आहे. याप्रकरणी तासगाव पोलिसांनी दोन्ही आरोपींना अटक केली.

मिळालेल्या माहितीनुसार, सांगलीच्या तासगाव तालुक्यातील येळावी येथे घरासमोर फटाके फोडण्याच्या कारणावरून दीपक सुवासे नावाच्या तरुणाची हत्या करण्यात आली. सख्ख्या भावांनी धारधार शस्त्राने वार करून दीपकची हत्या केली. या प्रकरणी दोन्ही भावांना तासगाव पोलिसांनी अटक केली. विश्वजीत मोहिते आणि इंद्रजीत मोहिते या अशी अटक करण्यात आलेल्या तरुणांची नावं आहेत. मृत दीपक सुवासे आणि आरोपी शेजारी शेजारी राहतात. सुवासे आणि मोहिते या दोन्ही कुटुंबात गेल्या काही वर्षांपासून जमीन आणि इतर कारणातून वाद होते. पुन्हा फटाक्यांचे निमित्त होऊन त्यांच्यामध्ये जोरदार भांडण झाले. त्यानंतर विश्वजीत आणि इंद्रजीतने दीपकची धारदार शस्त्राने वार करत हत्या केली.

तर दुसरीकडे पिपंरी चिंचवड शहरातील काळभोरनगर येथे किरकोळ वादातून एकाची हत्या झाली. किरकोळ वादातून एका कामगाराने दुसऱ्या कामगारावर लोखंडाने वार करून त्याची हत्या केल्याची घटना घडली. हत्येची ही धक्कादायक घटना सीसीटीव्ही कॅमेऱ्यामध्ये कैद झाली. २ नोव्हेंबरला रात्री दीड वाजताच्या सुमारास काळभोरनगर येथील व्ही. के. व्ही आटोमोटिव्ह प्रायव्हेट लिमिटेड या कंपनीमध्ये ही धक्कादायक घटना घडली.

दिपू कुमार (१९ वर्षे) या तरुणाची लोखंडी रॉडने वार करून हत्या करण्यात आली. दीपू कुमारचा मित्र मुकेश हिरा कुशवाहने लोखंडी रॉडने वार करून त्याची हत्या केली. कंपनीत जेवण बनवण्याच्या वादातून मुकेश कुशवाहाने दिपू कुमारची हत्या केली. या घटनेमुळे काळभोरनगर परिसरामध्ये खळबळ उडाली होती. या प्रकरणी पिपंरी पोलिसांनी मुकेश हीरा कुशवाह या आरोपीविरोधात हत्येचा गुन्हा दाखल करत त्याला अटक केली.