सांगली : आजच्या धकाधकीच्या व यांत्रिकीकरणाच्या युगात देखील अंधश्रध्येतून विचित्र असे प्रकार केले जात असल्याचे पाहण्यात मिळत आहे. अर्थात नागरिकांमध्ये भीती निर्माण केली जात असते. अशाच अंधश्रध्येतून मिरज तालुक्यातील टाकळी येथे भररस्त्यावर खिळे ठोकून लिंबू व गुलाल टाकण्याचा प्रकार करण्यात आला आहे. या प्रकारामुळे नागरिकांमध्ये चर्चेला उधाण आले असून भीती देखील पसरली आहे. 

सांगली जिल्ह्यातील मिरज तालुक्यातील टाकळी गावात गुरुवारी रात्रीच्या सुमारास हा प्रकार करण्यात आला आहे. गावातील भर रस्त्यावर अंधश्रद्धेचा हा प्रकार दिसून आला. रस्त्यावर चांदणीच्या आकाराची आकृती काढून त्यात लिंबू व कुंकू टाकून तसेच लिंबूत खिळे मारून उतारा टाकला होता. हा प्रकार पाहण्यासाठी ग्रामस्थांनी गर्दी केली होती. या प्रकाराने टाकळी गावात काहीकाळ भीतीचे वातावरण निर्माण झाले होते. 

ग्रामस्थांमध्ये चर्चेला उधाण 

दरम्यान ग्रामपंचायतीच्या नव्या इमारतीचे बांधकाम सुरू आहे. त्याच रस्त्यावर वर्तुळामध्ये चांदणीची आकृती रेखाटून त्यामध्ये लिंबू व कुंकू टाकण्यात आले होते. लिंबूत खिळे देखील घुसविण्यात आले होते. सकाळी हा प्रकार ग्रामस्थांच्या निदर्शनास आला. त्यानंतर ग्रामस्थांमध्ये भीतीचे वातावरण निर्माण झाले. घटनास्थळी ग्रामस्थांची मोठी गर्दी झाली होती. यावेळी गावातील काही सामाजिक कार्यकर्ते एकत्रित आले.

तरुणाने लिंबू कापून त्याचे सरबत करून पिले

दरम्यान हा अंधश्रद्धेचा प्रकार गावातीलच एका तरुणाने मोडून काढला. येथे खिळे घुसवून व कुंकू लावून टाकण्यात आलेले लिंबू घेऊन तरुणाने ते स्वच्छ धुतले. लिंबू कापून पाण्यामध्ये पिळून त्याचे सरबत बनवत पिऊन टाकले. अशा प्रकाराने माणसाच्या जीवनावर कोणताही परिणाम होत नाही. अशा गोष्टींना कोणीही घाबरू नये, असे आवाहन त्यांनी ग्रामस्थांना केले.