सांगली : दुधात मोठ्या प्रमाणात भेसळ केली जात असल्याचे पुन्हा एकदा समोर आले आहे. यात सांगलीच्या नागजमध्ये अन्न व औषध प्रशासनाकडून भेसळयुक्त दुध वाहतूक करणाऱ्या ट्रॅकरवर कारवाई करण्यात आली आहे. वाहतूक करणारे पाच टँकर ताब्यात घेऊन त्यामधील ७५ हजार लिटर दूध नष्ट करण्यात आले आहे. 

सोलापूर जिल्ह्यातील घेरडी येथून गाईचे दूध घेऊन पाच टँकर कोल्हापूरकडे निघाल्याची माहिती मिळाली अन्न व औषध प्रशासनाला मिळाली होती. दुधाचे टँकर घेरडी (ता. सांगोला) येथील एलकेपी दुध शितकरण केंद्र येथून दुध घेवून कोल्हापूर जिल्ह्यातील एका कंपनीकडे जात असल्याचे प्राथमिक तपासात निष्पन्न झाले आहे. त्यानंतर रत्नागिरी- नागपूर महामार्गावरील नागज फाटा या ठिकाणी सदरचे टँकर आढळून आले. 

दुधात आढळली मिठाची भेसळ 

दरम्यान अन्न व औषध प्रशासनाचे सहाय्यक आयुक्त निलेश मसारे, अन्न सुरक्षा अधिकारी पवार व स्वामी, नमुना सहाय्यक कवळे व कसबेकर यांच्या पथकाने रविवारी दुपारी नागज फाटा येथे सदरची कारवाई केली आहे. दुध वाहतुक करणाऱ्या पाच टँकरची तपासणी केली. टँकरमधील दुधाची इन्स्टंट स्ट्रीपच्या सहाय्याने प्राथमिक तपासणी केली असता यात मिठाची भेसळ आढळून आली. तर दुधाचे तीन नमुने विश्लेषणासाठी घेण्यात आले आहेत.

७५ हजार लिटर दूध केले नष्ट 
भेसळ आढळून आलेल्या ७५ हजार लिटर गाय दुधाचे पाच ट्रॅकर ज्याची किंमत साधारण १० लाख ६३ हजार ८६० रूपये किंमतीचा दुधाचा उर्वरीत साठा भेसळीच्या संशयावरुन ओतून नष्ट केला. तर भेसळयुक्त दुधाचे नमुने घेतले असून दुधाचा अहवाल प्राप्त झाल्यानंतर पुढील कार्यवाही करण्यात येणार असल्याचे सांगण्यात आले.