संजय जाधव, बुलढाणा|ता. ७ मे २०२४

गेल्या काही दिवसांपासून समृद्धी महामार्गावर अपघाताची मालिका सुरू आहे. आज सलग पाचव्या दिवशीही समृद्धी महामार्गावर भीषण अपघात झाल्याची माहिती समोर आली आहे. या अपघातामध्ये चार जण जखमी झालेत. अपघातातील जखमींवर सध्या रुग्णालयात उपचार सुरू आहेत.

याबाबत सविस्तर माहिती अशी की, राज्यातील समृद्धी महामार्ग पुन्हा एकदा अपघातांच्या मालिकेमुळे चर्चेत आला आहे. समृद्धी महामार्गावर आज सलग पाचव्या दिवशी भीषण अपघात झाल्याची बातमी समोर आली आहे. मुंबई कॉरिडॉरल चेनेज क्रमांक 284 वर हा अपघात झाला. चालकाला झोप लागल्याने भरधाव कार अनियंत्रित होऊन साईड बेरियरला धडकली.

या भीषण अपघातात कारमधील चार जण गंभीर जखमी झाले आहेत. याबाबतची माहिती मिळताच स्थानिकांनी घटनास्थळी धाव घेत अपघातग्रस्तांना मदत केली. अपघातातील जखमींवर मेहकर रुग्णालयात उपचार सुरू आहेत. त्यांपैकी दोघांची प्रकृती गंभीर असल्याचे सांगण्यात येत आहे.

समृद्धीवर पुन्हा अपघात सत्र...

दरम्यान, गेल्या काही दिवसांपासून समृद्धी महामार्गावर पुन्हा एकदा अपघातांची मालिका पाहायला मिळत आहे. काल समृद्धी महामार्गावर भीषण अपघात होऊन तीन जणांचा मृत्यू झाला होता. त्यानंतर आज सलग पाचव्या दिवशी अपघात झाल्याने समृद्धीवरील अपघातांची मालिका कधी थांबणार? असा सवाल उपस्थित होत आहे