रामू ढाकणे 

छत्रपती संभाजीनगर : छत्रपती संभाजीनगर शहरातील बेशिस्त रिक्षा चालकांवर कारवाई करण्यासाठी आता वाहतूक शाखेचे पोलीस ॲक्शन मोडवर आले आहेत. दरम्यान वाहतूक पोलिसांनी ४८० रिक्षांची तपासणी करून त्यापैकी ११३ रिक्षा जप्त करण्यात आल्याची माहिती वाहतूक शाखेने दिली. 

संभाजीनगर (Sambhajinagar) रिक्षा चालकांकडून बेशिस्तपणा सुरु आहे. वाहतूक पोलिसांनी अनेकदा कारवाई केल्यानंतर देखील रिक्षा चालकांची अनेकदा मनमानी सुरु असल्याचे पाहण्यास मिळते. दरम्यान बुधवारी एका महिला प्रवासीला गल्लीबोळातून फिरवत नेण्याचा प्रकार एका रिक्षा चालकांकडून करण्यात आला होता. यानंतर सदर महिलेने रिक्षा चालकांना मारहाण देखील केली होती. या घडलेल्या प्रकरणानंतर (Traffic Police) वाहतूक पोलीस खळबळून जागे झाले असून त्यांनी कारवाईचा बडगा उचलला आहे. 

विशेष म्हणजे दोन दिवसापूर्वीच रिक्षा संघटनेच्या प्रतिनिधींच्या बैठकीत नियम लावून प्रवाशांसोबत चांगली वागणूक ठेवण्याच्या सूचना करण्यात आल्या होत्या. मात्र काल एका महिलेला रिक्षा चालकाने जाणून गल्लीबोळातून घेउन जाण्याचा प्रकार घडला होता. हा प्रकार समोर आल्यानंतर त्यानंतर वाहतूक शाखेने ही कारवाई करण्यास सुरुवात केली. यात दिवसभरात ४८० रिक्षांची तपासणी करत ११३ रिक्षा जप्त केल्या आहेत.