पुणे कॅन्टोनमेंट मतदारसंघात भाजप विरुद्ध कॉंग्रेस अशी थेट लढत होत आहे. मात्र या ठिकाणी कॉंग्रेसच वर्चस्व आहे. त्यामुळे भाजप उमेदवाराला येथे फारशी पसंती मिळताना दिसलेली नाही. सकाळच्या एक्झिट पोलच्या आकडेवारीनुसार कॉंग्रेसचे रमेश बागवे यांना संभाव्य आमदार म्हणून पसंती मिळत आहे. त्यांच्या विरोधात भाजपचे सुनील कांबळे हे निवडणूक लढवत आहेत.

पुणे शहरात ज्या काही चुरशीच्या विधानसभा आहेत त्यात पुणे कॅन्टोनमेंट मतदारसंघाचा समावेश आहे. भाजपचे सुनील कांबळे हे या ठिकाणी विद्यमान आमदार आहेत. तर कॉंग्रेसचे रमेश बागवे हे माजी मंत्री आहेत. 2019 पूर्वी या ठिकाणी रमेश बागवे यांचा प्रभाव होता. मात्र 2019 ला भाजपने या मतदारसंघावर सत्ता मिळवली.

यंदाच्या निवडणुकीत या ठिकाणी विद्यमान आमदार सुनील कांबळे यांच्या विरोधात झालेल्या काही कारवायांमुळे भाजपला येथे फटका बसण्याची शक्यता आहे. तर कॉंग्रेसच संघटन या ठिकाणी मोठं असल्याने रमेश बागवे यांना पुन्हा संधी मिळण्याची शक्यता नाकारता येत नाही. या मतदारसंघात सर्वधर्मीय लोक आहेत. याचा फायदा दोन्ही उमेदवारांना होणार असला तरी कॉंग्रेसने या निवडणुकीत अंतर्गत गटबाजी रोखण्यात यश मिळवलं आहे. त्यामुळे रमेश बागवे यांच्या विजयाची शक्यता अधिक आहे.